Hip-Hop (Musik)
Hip-Hop-Musik (ok Rap-Musik) hett ehr Wuddeln in de swarte Funk- un Soul-Musik. Dor sünd denn noch de Rap (de ut de Toasting-Tradition vun Jamaika keem), dat Samplen un dat Scratchen to kamen. Düsse Musik is in de swarten Ghettos vun de USA upkamen. De Naam „Hip-Hop“ bedutt an un for sik nix. Wo dat Woort herkümmt, is nich mehr rut to finnen. De een seggt, dat weer de Sugarhill-Gang, de dat upbröcht hett, anner seggt, dat weer Lovebug Starski ween oder Kool DJ Herc oder ok DJ Hollywood.
Historie
ännern1970–1979
ännernIn de 1970er Johren is allens upkamen, wat later de Hip-Hop-Musik utmaakt hett. Kool DJ Herc is as eersten DJ al 1983 dor up kamen, datt he bloß den Beat vun een Funk-, Soul oder Discostück noch mal speelt hett un nich dat ganze Leed. He keem dor ok up, twee verscheden Beats tohopentosmieten (dat warrt Beatjuggling nömmt). Up sien Blockpartys weeren ok de eersten B-Boys mit den neen Breakdance to sehn. Vun 1976 af an hett Grandmaster Flash anner nee DJ-Künsten upbröcht. Dor weer dat Cutting bi (dat is dat Inspelen vun lüttje Musikstücken to den Beat hento), dat Backspinning (dat is dat slanke Torüchdreihen vun een Platt, dormit een Afsnitt noch mol speelt weeren kann) un dat Phasing (dor warrt een vun de beiden Plattentöller een lütt beten sinniger afspeelt). De DJ Grand Wizard Theodore hett de Tiet vun dat Utfinnen un Utproberen vun de wichtigst DJ-Künsten för de Hip-Hop-Musik denn korte Tiet later afslaten, as he de meist bekannte Technik utfunnen hett. Dat weer dat Scratchen. Düsse DJ weer vördem vun Grandmaster Flash in de Szene inföhrt wurrn.
Wannehr dat mit dat Rappen losgüng, kann een nich so genau seggen. Dat hett woll al in dat Johr 1970 een eerst Album vun The Last Poets geven, de ünner den Indruck vun Malcolm X un den Dichter Amiri Baraka stünnen un so een Aart vun politschen Rap maakt hefft. Dat warrt ok meist seggt, düsse Grupp, dat weern de Vadders vun den Rap. Man an un for sik is dat Rappen an een ganz anner Steed upkamen. Dat weer bi de Lüde, de MCs nömmt wurrn sünd. Dat weeren de Masters of Ceremony, de an't Enn vun de 1960er un an'n Anfang vun de 1970er Johren bi de DJs mit bi weern. Jem ehr Upgaav weer, datt se den DJ un sik süms vörstellen döen (dat wurr „shouting out“ nömmt), datt se de Lüde to'n Danzen upfoddern döen, Jokus maakden, de Besökers begröten döen un de Fier in Gang bröchen. De weeren so wat, as Animateuren.
Vun den Hip-Hop ut de eerste Tiet gifft dat vundaag keen Tondokumenten. Dormals weer de DJs ehr grode Tiet. De Musik wurr live speelt un bi de Plattenindustrie wurrn Platten, wo anner Platten up afspeelt weert so ankeken, datt se up'n Markt keen Chance harrn. Dat duur so lang, bit de Hip-Hop as egen Stil mit egen Technik ansehn wurr. Dör keemen denn so nömmte Mixtapes rut. De eerste Platte vun den Hip-Hop is eerst 1979 rutkamen. Dat weer de Single „Personality Jock“. Rutbrocht wurr de vun den Rapper King Tim III un de Discoband „Fatback Band“. Een Week later keem denn ok de beröhmte Rapper's Delight vun de Sugarhill Gang rut. Dat weer een unbannigen Erfolg un de ganze Welt hett sik dor öber wunnert, dat dor mehr as 8 Million Stück vun verköfft wurrn sünd. De eerste grode Rap-Star weer aber Curtis Blow, de bit in de Midden vun de 1980er Johren groden Erfolg harrt hett.
1980–1989
ännernNa Rapper's Delight hett jedereen begrepen, dat een mit Hip-Hop-Musik Geld verdenen kann. Nu hett de Musikindustrie de Saak in'e Hand nahmen. Dormols is noch vun Rap snackt wurrn (de Begreep Hip-Hop weer noch nich begäng). As Blondie mit Rapture den eersten „witten“ Rap rutbröcht harr un dat denn glieks en Nr. 1-Hit wurrn weer, dor güngen all Dören vun de Musikindustrie open för düssen neen Musikstil.
Bi dat Label Sugarhill weer dortiets al Rapper's Delight rutkamen, un nu nehmen se Grandmaster Flash ünner Verdrag. He arbeit al vun 1977 af an tohopen mit de Rap-Grupp The Furious Five. 1980 bröch he nu dat Album The Adventures Of The Wheels Of Steel rut. Dat weer dat eerste Hip-Hop-Album, wat överhaupt rutkamen is. Up düt Album weer besunners de DJ wichtig un to'n eersten Mol konnen Musikfrünnen in de ganze Welt buten New York mit sien Blockpartys hören, wat so'n DJ tostann bringt.
1982 un 1983 bröch de Grupp de Singles The Message un White Lines (Don't Do It) rut. Nu geev dat nich mehr bloß Partytexten un Dummtüüch to hören, man de Leder hanneln vun dat Leven in dat Ghetto un vun de Problemen in de Sellschup. Dat duur nich lang, denn kreeg de Grupp sik in'e Klatten un güng ut'neen.
