Red Heat
Red Heat (op plattdüütsch so veel as „Rode Hitt“) is de Titel vun en US-amerikaanschen Actionfilm ut dat Johr 1988. Speelbaas weer Walter Hill, de ok an’t Dreihbook mitschreven hett. De Hööftrullen speelt Arnold Schwarzenegger un James Belushi.
| Filmdaten | |
|---|---|
| Plattdüütsch Titel: | — |
| Originaltitel: | Red Heat |
| Düütsch Titel: | Red Heat |
| Produkschoonsland: | USA |
| Johr vun’t Rutkamen: | 1988 |
| Läng: | 104 (FSK 18) 99 (FSK 16) Minuten |
| Originalspraak: | Engelsch |
| Öllersfreegaav in Düütschland: | FSK 18 (sneden: 16) |
| Filmkru | |
| Speelbaas: | Walter Hill |
| Dreihbook: | Walter Hill Harry Kleiner Troy Kennedy Martin |
| Produkschoon: | Walter Hill Mario Kassar Andrew G. Vajna |
| Musik: | James Horner |
| Kamera: | Matthew F. Leonetti |
| Snitt: | Donn Aron Carmel Davies Freeman A. Davies |
| Szenenbild: | John Vallone |
| Kledaasch: | Dan Moore |
| Dorstellers | |
| |
Inholt
ännernDe Film fangt in de Sowjetunion vör den Fall vun’n Iesern Vörhang an. Dor arbeit de russ’sche Polizist Ivan Danko doran, den georgischen Drogenhännler Viktor Rosta fasttonehmen. Bi en Razzia in en düstere Gaststuuv kann he em mit en poor vun sien Mackers utfinnig maken. Wiel Danko de Bande dingfast maken kann, nimmt sik sien Fründ un Partner Yuri den flüchtigen Rosta vör, warrt dorbi aver Doodschaten. Rosta sett sik dorna mit twee Mackers in de USA af, woneem he korte Tiet later wegen en Bagatell in Chicago fastnahmen warrt. Danko warrt afkummandeert, üm Rosta vun dor torüch in sien Heimat to bringen. Bi den Fall arbeit he mit de beiden Grootstadtpolizisten Tom Gallagher un Art Ridzik tohopen.
De Övergaav löpt an sik ganz licht, man op eenmol gifft dat en Scheeteree, bi de Gallagher doodschaten un Rosty befreet warrt. Üm den Fall optokloren seht sik de beiden unglieken Polizisten – de lienentroe Russe Danko un de smuddelige Ridzik, de faken hard an de Grenz vun de Legalität arbeit – tosamenarbeiten.
Bi de Ünnersöken kummt rut, dat de Lüüd, de Rosta rutholt hebbt, Liddmaten vun de „Clean Heads“ sünd – en Bande vun Afroamerikaners, de vun’t Gefängnis ut vun den blinnen Abdul Elijah anföhrt warrt. Twüschen Rosta un Elijah geev dat en Hannel över en grote Drogenmengde in’n Weert vun 5 Millionen US-Dollar, de Rosta över dat Nett vun siene Heimat in de Sowjetunion bringen wull. Keeneen weet, woneem dat Geld verwohrt warrt. De eenzige Henwies is en sünnerboren Slötel, den Rosta verloren hett.
In de Twüschentiet kamt sik de beiden verschedenen Polizisten neger, man bi jemehr Ünnersöken sünd se de annern jümmer en Schritt achteran: toeerst warrt Rostas Partner un denn ok sien Ehfro Cat Manzetti vun den Dealer ümbröcht, bevör Ridzik un Danko wat ut jem Rutbringen kann. Butendem kriggt Rosta opletzt sien Slötel torüch. As Ridzik de Fall wegnahmen warrn schall un Danko kort dorför steiht, in de Sowjetunion afschaven to warrn, kamt de beiden op de Idee, dat de Slötel to en Sluutfack an’n städtschen Bahnhoff höört.
De beiden Polizisten stellt Rosta dorophen en Fall, de denn ok tosnappen deit. Tosammen kriegt se Rosta tofaten mitsamt de Drogen un dat Geld. Mit en Bus kann Rosta utneihn, man de beiden Polizisten verfolgt em mit en wieteren Bus dweer dör de halve Stadt. In’n Showdown warrt Rosta sien Bus op en Bahnövergang vun en Tog rammt un tonichten maakt. In de Överresten vun den Bus finnt Danko den Dealer un maakt em opletzt an de Siet.
An’n Sluss gaht de beiden Polizisten as Frünnen utenanner, ofschoonst se beid so ünnerscheedliche Weltansichten hebbt, un tuuscht sogors jemehr Armbandlocken ut.
Kritiken
ännern- Lexikon vun’n internatschonalen Film: „Spannend und effektvoll inszenierter Kriminalfilm, im Mittelpunkt die allmählich wachsende Freundschaft zweier grundverschiedener Charaktere; mit Witz, aber auch harten Actionszenen aufbereitet.“
Anners wat
ännern- De Film is deelwies in Wien, in Ungarn un in Moskau dreiht worrn. De Filmkru üm Walter Hill weer de eerste US-amerikaansche Kru, de Verlööf kregen hett, op’n Roden Platz to dreihn.
- De Film is den Stuntkoordinater Bennie E. Dobbins todacht worrn. De is wiel de Dreiharbeiten to de Kampszenen in’n Snee in Wien doodbleven.
- Arnold Schwarzenegeer hett för den Film mehrere Kilogramm afnehmen müsst. Hill hett bi den Film mehr Weert leggt op en kantig Gesicht as op grote Bargen vun Muskeln.
- Schwarzenegger hett för sien Rull butendem dree Maanden lang Russ’sch lehrt. Belushi hett in Vörbereiten op sien Rull twee Weken oip en US-amerikaansche Polizeideenststeed tobröcht.
- För de Szeen in’t Gefängnis weern ruchweg 200 echte Insitters as Kumparsen bruukt.
Weblenken
ännern- Red Heat in de Internet Movie Database (engelsch)
- Kritiken to’n Film bi Rotten Tomatoes