Reetdack
Een Reetdack (pl. Reetdäcker) is een typisch olle Dackdecken, wat’t op de hele Welt geben dä. Hüttaudags find’n dat noch veel an’e Küst un an Seen. Reet oder ok Rohr oder Schülp is een Plantenoort ut de Fomilie vun dat Söötgras, dat in’e Hauptsook an’n Water un in Sump wassen deit. Dat Reet (de Stengel dorvun) ward in’e Wintertiet arnt un to Bünnel oder Schoof tohopen bunnen. Nadem dat dröögt, sorteert und rein maakt is, bringt et de Reetdackdecker op’t Dack un boot dormit de Dackfläken. De Timmermann boot tovör den Dackstool un nagelt de Dacklatten op. Nötig is een Dackneegen mehr as 45 Grad, wenn’t dor ünner is, denn löppt dat Water to sacht af un dat Reet ward fix mol möör. Dat Reet ward in Lagen op’t Dack leggt, lieklopend to de Dacklatten ward een stobilen Draht (fröher nööm’n dor Wiedenswutschen) un de wöör dörch dat Reet dörch mit de Dacklatten stramm tosomen bunnen. So ward Laag för Laag opbröcht un de Ünnerkant ward mit’n Kloppbrett to een glatten Flääk bröcht.
Wenn dat Reetdack goot boot is, üm un bi fiefuntwinnig Zentimeter Dickde hett, dat Dack na den Regen jümmer wedder afdrögen kann un keen Vagels nisten doot, denn kann dat woll bet to föfftig Johr holen.
