Richard Obricatis

Wilhelm Richard Paulus Obricatis (* 12. September 1861 in Königsbarg; † 16. November 1914 bi Langemark in Belgien) weer en düütschen Pädagoog.

Obricatis is 1861 as Söhn von’n Koopmann Karl Leopold Obricatis in Königsbarg boren. He weer dor op dat Kneiphöfische Gymnasium un an’n 3. September 1879 sien Abitur maakt. Na de School hett he klassische Philologie an de Universität Königsbarg studeert un hett an’n 24. März 1884 den Dr. phil. maakt. An’n 19. Juli 1884 hett he ok de Staatsprüfung bestahn. Na dat Studium weer he von’n 1. Oktober 1884 bet 1. Oktober 1885 Eenjohrig-Freewilligen in Königsbarg.

Von’n 1. Oktober 1885 bet 1. Oktober 1886 hett he sien Probejohr an dat Kneiphöfische Gymnasium maakt un is denn an’n 1. Oktober 1886 wetenschoplichen Hülpslehrer an dat Königliche Gymnasium in Lyck worrn. Dor is he an’n 1. Dezember 1887 fast anstellt worrn. An’n 1. April 1897 hett he den Rang von en Oberlehrer kregen. To’n 1. April 1900 is he an dat Königliche Willemsgymnasium in Königsbarg kamen. An’n 13. Dezember 1904 is he as Königlichen Gymnasialdirekter ernannt un to’n 1. Januar 1905 as Direkter an dat Königliche Gymnasium in Bartenstein versett worrn. Dor is he bet Johannis 1906 bleven. To’n 1. Juli 1906 is he denn as Rekter an dat Athenaeum in Stood wesselt. Dor weer he bet 1912. He hett in Stood in de Iesenbahnstraat 7 wahnt. To’n 1. Januar 1913 is he an dat Kaiserin-Auguste-Viktoria-Gymnasium in Linden versett worrn.

Obricatis is in’n März 1887 Leutnant von de Landwehr worrn, 1894 Oberleutnant un an’n 22. November 1902 Hauptmann. To’n 15. September 1905 is he ut de Landwehr utscheden. As de Eerste Weltkrieg utbreken dee, hett he sik glieks to Anfang von’n Krieg to’n Deenst mellt. He keem as Kumpanieföhrer von dat Reserve-Infanterie-Regiment 215 an de Westfront un hett an’n 22. Oktober 1914 in de Eerste Flannernslacht bi dat belgsche Wydendreft (lütt Enn in’n Noordwesten von Langemark) een Kugel dör den Arm un een dör de Bost kregen. He keem denn in en Lazarett un is dor an’n 16. November doodbleven. Obricatis liggt begraven op’n Düütschen Soldatenkarkhoff Langemark (Block A, Graff 3938). Kort vör sien Dood harr Obricatis ok dat Ieserne Krüüz kregen.

Warken

• De „per“ praepositionis latinae et cum casu conjunctae et cum verbis nominibusque compositae usu, qualis obtinuerit ante Ciceronis aetatem. (Dokterarbeid), Königsbarg 1884