Robert Cox Merton
Robert Cox Merton (* 31. Juli 1944 in New York) is en US-amerikaansch Ökonom un Hoochschoollehrer. Sien Hööftrebeet is de quantitative Analyse vun den Kapitalmarkt mit Methoden vun de modern Stochastik, footend up den Modelleeren vun den tokünftigen Kursverloop vun de Kapitalgöder as kontinuierliche Brownsche Bewegung. Sien bekanntst Resultat is de Bestätigung, dat de Black-Scholes-Formel to dat Bestimmen vun Optschoonswerten ok in’n Fall vun kontinuierlich Tiet gellt. Dorför kreeg he 1997 gemeensam mit Myron Samuel Scholes den Nobelpries för Wertschapswetenschapen. Ähnliche Bidrääg hett he ok to dat Konsum-Investitschoons-Problem un to’n Insatz vun Optschoonspriesmodellen as Insolvenzprognoseverfohren leist.
Leven
ännernRobert Cox Merton is de Söhn vun Robert King Merton, en amerikaansch Sozioloog. Sien Moder Suzanne Carhart stamm ut en traditschoonsriek Methodisten-/Quäkerfamilie ut New Jersey. Nah den Gebortsnaam vun sien Moder is Robert Cox Merton pk ünner de Naam Robert Carhart Merton bekannt.
All as Kind hett he sück för Mathematik un Finanzen interesseert. He hett an de School of Engineering and Applied Science vun de Columbia University studeert. Nah sien Afsluss in anwennd Mathematik gung he 1966 an dat California Institute of Technology, um en Dokterarbeit to schrieven, hett sück aber 1967 entslooten, en Studium vun de Bedrievswertschap an dat Massachusetts Institute of Technology antofangen. Hier hett Paul Anthony Samuelson düchtig Indruck up hüm maakt, de sien Assistent he wurr. 1970 hett Merton sien Dokterarbeit schreeven un hett denn Ökonomie an de MIT Sloan School of Management lehrt, bit he 1988 an de Harvard University beropen wurr.
An de Sloan School hett he Myron Samuel Scholes un Fischer Sheffey Black kennen lehrt. Ut hör Tosommenarbeit entstunnen grundleggend Arbeiten över de Bewertung vun Aktienoptschonen. De Methode is hüüd as Black-Scholes-Modell bekannt. De Naam Merton-Black-Scholes-Methode weer woll gerechter, hett sück aber nich dörsett. All dree wurrn aber in’n Rahmen vun de Nobelpriesverleehn würdigt. Fischer Black weer all storven, anners weer he woll Mit-Priesdräger wurrn.
1986 weer Merton Präsident vun de American Finance Association. 1986 wurr he in de American Academy of Arts and Sciences wählt, 1993 in de National Academy of Sciences beropen.
Merton hett de vun hüm funnen Finanzeerensmodelle ünner annern as Mitbegrünner vun Long-Term Capital Management (LTCM) anwennd. Disse 1994 grünnd Hedgefonds hett innovative Finanzprodukte entwickelt un up den Markt brocht. Bit to dat Johr 1998 harr LTCM nah en bekannt maakt Schätzung Kuntrakte in‘n Gesamtwert vun een Billion Dollar afslooten; dat hannel sück um Derivate, Swaps un anner Komplexe Finanzeerensinstrumente. Wegen de slechter wurrn makroökonomischen Bedingungen in de Swellenlännern, de Russlandkrise un Fehlspekulatschonen mit italieensch Staatsanleihen keem LTCM tonehmend ünner Druck. Man weer bang, dat dör de Fehlspekulatschonen en Kettenreaktschoon togang keem, de to en Tosommenbröök vun dat internatschonale Finanzsystem führen kunn. In en bit dorhen weltwiet eenmalig Rettungsaktschoon wurr 1998 dat Schlimmste afwennd; de Fonds wurr 2000 endgültig uplöst.[1]
2002 hett Merton in de Debatte um dat Verbooken vun Aktienoptschonen för Mitarbeiter ingreepen. De Vergaav vun Aktienoptschonen weer in de Johren dorför en geern nommen Middel, um Mitarbeiter an Internet-Startupfirmen to binnen. Dat is allgemeen begäng, disse Optschonen erfolgsneutral un nich as Upwand (also erfolgswirksam) to verbooken. Disse Praxis wurrd vun eenig Ökonomen mitverantwortlich dorför maakt, dat dat um dat Johr 2000 herum to en Upblähen vun vun Aktienkursen mit ansluutend Platzen vun de Spekulatschoonsblaas keem. Merton hett sück dorför utspraaken, vergeven Aktienoptschonen as Upwand to verbooken.
Böker
ännern- Robert Merton, Zvi Bodie: Finance, Prentice-Hall, New Jersey 1998.
- R. Merton, D. Crane, K. Froot, S. Mason, A. Perold, Z. Bodie, E. Sirri, and P. Tufano: The Global Financial System: A Functional Perspective, Harvard Business School Press, Boston 1995.
Weblinks
ännern
Enkeld Nahwiesen
ännern- ↑ Cihan Bilginsoy: A History of Financial Crises: Dreams and Follies of Expectations. Routledge, 2015, ISBN 978-0-415-68724-9 (englisch). Hier Siet 353.