Ronnie Walter Cunningham
Ronnie Walter „Walt“ Cunningham (* 16. März 1932 in Creston, Iowa, USA; † 3. Januar 2023 in Houston, Texas) weer en amerikaansch Astronaut. He floog as tweet Pilot mit Apollo 7.
Leven ännern
Cunningham hett de High School in Venice (Kalifornien) besöcht. 1951 is he in de US-Marine intreeden un fung 1952 sien Floogtraining an. He hett Physik studeert un kreeg 1960 sien Bachelor un 1961 den Master an de University of California, Los Angeles (UCLA). 1974 keem noch en Doktertitel an de Harvard Graduate School of Business dorto. Cunningham hett mehr as 4500 Floogstünnen, dorvan mehr as 3400 Stünnen in Strahlfloogtüüch.
Bi de NASA ännern
1963 wurr he vun de NASA för de darte Astronautengrupp utwählt. An’ 29. September 1966 wurr he för den tweeten bemannten Apollo-Floog mit utsöcht. De beid anner Crew-Liddmaaten sullen Walter Marty Schirra as Kommandant un Donn Fulton Eisele ween. In' November 1966 wurr disse Floog afseggt, un de dree Astronauten wurrn de Ersatzmannschap för den eersten bemannten Apollo-Floog, Apollo 1. Bi en Test an' 27. Januar 1967 keemen aber all dree Liddmaaten vun de Hööftmannschap to Dood, un all Mannschapsindeelen weern vöreerst henfällig. An' 9. Mai 1967 wurrn Schirra, Eisele un Cunningham denn as Mannschap för den eersten bemannten Apollo-Floog bekannt geven. De Mission harr nu de Beteken Apollo 7.
Apollo 7 is an' 11. Oktober 1968 start un bleev meest 11 Daag in de Eerdumloopbahn. Ut technisch Sicht leep disse Mission hervörragend. Dat wurr en Rendezvous mit de bövere Stuuf vun de Saturn 1B-Rakete dörführt un de eerst Feernsehbiller ut en amerikaansch Ruumschipp to de Eer send. De Mission gung an’ 22. Oktober seker to Enn'. 10 Daag, 20 Stünn un 8 Minüüt weern se ünnerwegens. De Astronauten hemm aber wiels de Mission ünner en Schnuppen leeden un dat herrsch en temelk reizt Stimmung tüschen de Floogleitzentraal un de Besatten vun dat Ruumschipp. All dree Astronauten kreegen dornah kien Insatzmögelkeiten bi de NASA mehr, ofschons Eisele noch Liddmaat vun de Ersatzmannschap vun Apollo 10 weer.
Van 1968 bit 1971 weer Cunningham Leiter vun de Skylab-Afdeelen vun dat Astronautenbüro. He weer an de Entwicklung vun de Ruumstatschoon Skylab un an de vun dor dörtoführen Experimenten bedeeligt.
Nah de Astronauten-Loopbahn ännern
Nah sien Utscheeden ut de NASA in’n August 1971 weer Cunningham leitend in verscheedenen Wertschapsünnernehmen tätig.
Cunningham is to’n tweeten Mal verheiraadt un hett twee Kinner ut sien eerste Ehe. He gellt as Sportenthusiast un wiest besünner Interesse an Tennis.
1977 hett he sien Book "The All-American Boys" herutbrocht, dat de minschlich Siet vun dat Ruumfohrtprogramm wies.
Weblinks ännern
Ronnie Walter Cunningham. Mehr Biller, Videos oder Audiodateien to’t Thema gifft dat bi Wikimedia Commons.