Rosalyn Sussman Yalow

Rosalyn Yalow, boren. Sussman (* 19. Juli 1921 in New York City, New York; † 30. Mai 2011 ok dor) weer en US-amerikaansch Physikerin.

Rosalyn Sussman Yalow (Oktober 1977)

Leven

Rosalyn Sussman is as Dochter vun dat Immigrantenehepaar Simon un Clara Sussman in New York upwussen.

All to de Tiet, as se sück an dat Hunter College up de Physik spezialiseeren dee, hett se 1939 an de Columbia University de Vördrääg vun Enrico Fermi tohört. Se hett dor ok hör lateren Mann, Aaron Yalow, kennenlernt; hör Studium hett se sück mit Sekretariatsarbeiten för hör Perfessers finanzeert..

Nahdem se in’ Januar 1941 hör B.A. in Physics makt harr wurr hör en Assistentenstäe an de University of Illinois at Urbana-Champaign andeent, wo se sück as eenzig Fru ünner 400 Studenten dörsett hett. 1942 hett se dor den hör M.S. in Physics makt un en Johr later hett se Aaron Yalow heiraadt. 1945 hett se hör Doktertitel Ph.D. in Nuclear Physics makt.

Nah en körten Anstellung – as eenzig Fru – an dat Federal Telecommunications Laboratory' (ITT) gung se 1946 as Physikperfesser an dat Hunter College torüch, wo se bit 1950 Ünnerricht geev.

All 1947 fung se an neben hör Lehrtätigkeit an dat Veterans Administration Hospital in de Bronx, New York to arbeiten. In’ 1950 fung hör 22-johrig eng Tosommenarbeit mit Solomon Aaron Berson an. Se hebbt sück mit de Nahwies vun Peptiden in’t Blood befaat. Nahdem se Globine un anner Serumproteine meeten kunnen, hebbt se sück den lüttgeren Molekülen towendt.

Bi hör Insulin-Studien hebbt de beid opdeckt, dat mit Insulinpräparaten behannelt Diabetiker Antikörper gegen de tierischen Insuline bilden dee. Dorut hebbt se Methoden to dat Meeten vun den Insulinspeegel in’t Blood entwickelt. 1959 hebbt se as Gebortsjohr vun de Methood vun de Radioimmunassay betekent, dat hüüd weltwiet in de medizinisch Labors insett wurrd. Berson un Yalow hebbt hör Erkenntnisse nich patenteeren laaten, dormit se allgemeen bruukt wurrn könnt.

1968 gung Solomon Berson as Institutsvörstand an dat Department of Medicine at the Mount Sinai School of Medicine un Yalow övernehm de interimistisch Leiten un wurr 1970 to’n Chief nömmt. Nah den fröhen Dood vun Berson 1972 wurr dat Labor up Yalow hör Wunsch in Solomon A. Berson Research Laboratory ümnömmt, so that his name will continue to be on my papers as long as I publish and so that his contributions to our Service will be memoralized.

Rosalyn Yalow hett van 1968 bit 1979 an de Mount Sinai School of Medicine un van 1975 bit 1985 an de Yeshiwa Universität in New York lehrt.

Van 1973 bit 1979 weer se Mitherutgeverin vun Hormone and Metabolic Research.

1971 kreeg Yalow en Gairdner Foundation International Award un 1976 den Albert Lasker Award for Basic Medical Research. 1977 wurr se för de Entwicklung radioimmunologisch Methoden dvun de Bestimmen vun Peptidhormonen mit den Nobelpries för Physiologie oder Medizin uttekent. Se weer dormit nah Gerty Cori de tweet Fru, de disse Utteknung kreeg.

Van 1980 bit 1985 wee Yalow Vörsitterin vun dat Department of Clinical Science, Montefiore Hospital and Medical Center.

1986 wurr Rosalyn Yalow Emeritus Professor, Albert Einstein College of Medicine, Yeshiva University

Die Begeisterung für das Lernen trennt die Jugend vom Alter. Solange du lernst, bist du nicht alt.

Rosalyn un Aaron Yalow hebbt twee Kinner, Benjamin and Elanna. Se hebbt in Riverdale, New York, wahnt.

Literatur

• Susanne Paulsen: Wir Frauen müssen an uns glauben, sonst wird es keiner tun in Charlotte Kerner (Hrsg): Madame Curie und ihre Schwestern – Frauen, die den Nobelpreis bekamen, Beltz Verlag, Weinheim und Basel 1997, ISBN 3-407-80845-3
• Eugene Straus: Rosalyn Yalow: Novel Laureate Her Life and Work in Medicine: Her Life and Work in Medicine – A Biographical Memoir, ISBN 0-7382-0263-0
• Dennise Gellene: Rosalyn S. Yalow, Nobel Medical Physicist, Dies at 89. In: The New York Times, 1. Juni 2011.

Weblenken

• Yalow up de Siet vun den Nobelpries
• DNB-Katalog
• Personennaamdatei