Royan

Royan is ene Gemeende in Frankriek in dat Département Charente-Maritime (17) in de Region Poitou-Charentes.

Royan sien nee Stadtbild

Geografie

De westfranzöösche Stadt mit um un bi 18.000 Inwahners liggt an den Atlantik, an de Noordsiet vun de Gironde-Münnen. Twuschen Royan un Le Verdon-sur-Mer gifft dat en Fähr över de Münnen, de hier 15 km breet is.

Geschichte

Royan is vörmols en mondänen Badeoort ween. Man an'n 5. Januar 1945 is de ganze Stadt in'n Dutt gahn, as de US-amerikaansche Luftmacht dor ehre Bomben över afsmeten hett. Dormols weer Royan noch in düütsche Hannen. De US-Historiker Howard Zinn, de in'n Januar 2010 sturben is, hett vertellt, he sülms harr an'n 14. April 1945 as Pilot vun een vun 1.200 swaare US-Bombers, de dor unnerwegens weern, to'n eersten Mol in Europa Napalm över de lüttje Habenstadt afsmeten. Wietaf vun de Front hefft düütsche Truppen de Stadt noch en poor Weken vör de düütsche Kapitulatschoon holen. In de 1950er un 1960er Johre is de Stadt na en ganz neen Plaan na de Regeln vun de moderne Architektuur wedder upboot wurrn. Dat franzöösche Ministerium för den Wedderupbo harr Royan to en „Laboratorium för Stadtbo-Forschung“ verklaart. Ok de Kathedraal Notre Dame, de över de Binnenstadt rutrecken deit, is ut Beton ganz nee boot wurrn.

• 
  De Strand
• 
  De Haben mit de Kathedraal achtern in'e Midden
• 
  De Fähre nah Le Verdon