Scapa

Scapa is en Whisky-Brenneree in St. Ola an’n Scapa Flow op dat Eiland Mainland vun de Orkneys, Schottland.

Scapa
Brenneree Scapa
Land	Schottland
Region	Eilannen
Tyyp	Malt
Status	aktiv
Besitter	Pernod Ricard
Grünnt	31. Januar 1885
Grünner	John T. Townsend, MacFarlane
Waterborn	Lingo Burn
Washstill(s)	1 × 13.500 l
Spiritstill(s)	1 × 12.563 l
Produkschoonsvolumen	1.000.000 l
Websteed	www.scapamalt.com

Historie

De Brenneree is 1885 dör John T. Townsend un MacFarlane op dat Rebeet vun en fröhere Möhl boet worrn un hett dat glieke Johr noch ehr Produkschoon opnahmen. Se weer 1919 vun de Scapa Distillery Company Limited övernahmen. Twüschen 1934 un 1936 weer de Anlaag stillleggt un is dorna an de Bloch Brothers Limited verköfft worrn, de de Destille 1954 an Hiram Walker & Sons wietergeven hebbt. De hebbt de Destille vun Grund op nee maakt un ok ne’e Brennblasen inboen laten. Siet 1959 warrt en Lomond Wash Still insett. Toeerst weer dat de lütte Prototyyp, de 1956 boet weer, de toeerst bi Inverleven för de Produkschoon vun Lomond un denn kort för de Produkschoon vun Glencraig bi Glenburgie insett weer. 1971 is dorför en dubbelt so grote insett worrn. Scapa is hüüt de eenzige Brenneree för Single-Malt-Whisky, de noch mit en Lomond still arbeit, man de verstellboren Schieven sünd wegmaakt worrn. Nu kann een den Torüchloop nich mehr so fien kuntrolleren, aver man spaart sik dat opwännige Reinmaken vun de Schieven.

De Brenneree weer 1994 stillleggt. Vun 1997 bit November 2004 is se aver tietwies vun de Arbeiters vun Highland Park bedreven worrn, de in’n Utgliek de Lagerhüüs vun Scapa mit nütten dröff. Siet Enn 2004 warrt de Brenneree wedder vull bedreven.

Produkschoon

Scapa höört to dat schottische Whiskyrebeet Eilannen. Dat Water för de Produkschoon stammt ut den Lingo Burn un bargt – anners as dat Molt – teemlich veel Törf. De Brenneree hett en Meeschfatt (mash tun) vun 3,76 t un söss Gäärfatten (wash backs) vun tosamen 352.000 l. Brennt warrt in en ümboete Lomond wash still vun 13.500 l un en spirit still vun 12.563 l. To’n Riepen warrt de Whisky alleen in Bourbon-Fatten lagert.

Kiek ok

• List vun de schottischen Brennereen

Weblenken

Scapa. Mehr Biller, Videos oder Audiodateien to’t Thema gifft dat bi Wikimedia Commons.