Schuulgas

As en Schuulgas warrt en Gas oder Gasgemisch betekend, dat bruukt warrt, üm in bestimmte Rebeden oder Rüüm de Luft ut de Atmosphäär to verdrängen. Dat bedröpt vör allen den Suerstoff.

Faken warrt Schuulgasen in de Verpacken vun Levensmiddel insett, dormit de nich mit den Suerstoff reageert un ok vör Bakterien ut de Luft schuult sünd. Disse Schuulgasatmosphäär is tomeist tohopensett ut natürlich Bestanddeelen vun de Luft, de ahn Röök sünd un den Smack nich ännern doot. Dat künnt t. B. Stickstoff oder Kohlendioxid wesen. Se gellt nich as Tosetten na dat Levensmiddelgesett, sünd unbedenklich, wiel de nich op de Levensmiddel inwarkt un mööt dorüm ok nich angeven warrn.

Schuulgas warrt ok insett bi’t Schweißen, üm bi den Vörgang en Oxidatschoon vun de Materialen to vermasseln. En tyypsch Schuulgas dorför is Corgon18, dat ut 82% Argon un 18% Kohlendioxid besteiht.

Ok in de Elektrotechnik warrt Schuulgas bruukt, üm de elektrisch Leddanlaag in de Ümgegend vun Schalters un Kontakten rünnertosetten, dormit dor keen Funken tostannen kommt. Gleihbeern sünd t B. ok mit Schuulgas füllt, dormit de Gleihdraht hitter maakt warrn kann un he dorbi nich dörbrennt.