Sebastian Eberhard Ihering

Sebastian Eberhard Ihering (ok: Jhering) (* 8. Mai 1700 in Freebörg; † 29. Januar 1759 in Auerk) weer en düütschen Beamter. He gellt as Kultiveerer vun de oostfreeschen Moore.

He entstamm en berühmten oostfreeschen Familie, de naamhaft Theologen, Amtmänner, Juristen un Gelehrten rutbrocht hett, de deelwies för ganz Düütschland vun Bedüüden weern. Sien Vader weer Rentmeester in Freebörg un sien Moder weer en Dochter vun Anton Pauli, de oostfreesch Rat un Amtmann in Nörden weer. Beid Grootmoders vun Ihering entstammen de noch berühmtere Familie Conring ut Oostfreesland.

Ihering hett Juristeree studeert un is denn vun Fürst Georg Albrecht vun Oostfreesland in den Staatsdeenst övernommen wurrn. Wiel he sück besünners klüftig un pragmatisch anstellt hett, mak he bold Karriere. He wurr gau Liddmaat vun de oostfreesch Landsregeeren, Regierungs- un Kammerrat un hett sück denn ok mit den Diekbau un den Dünenschuul as ok mit de Fehnkultur beschäftigt. Diekbau un Dünenschuul weern besünners wichtig, harr man doch eerst 1717 und 1720 twee gewaltig Stormfloten överstahn.

För de Fehnkultur hett he groot Projekte in Angreep nommen. Eerst hett he dat Wiesedermeer dröög leggt, denn de Riepster Hammrich un noch eenig Hoochmoore kultiveert. Sien privat Anwesen in Boekzetelerfehn und Jheringsfehn (dat nich nah hümm nömmt is) hett he dorbi ok systematisch wieder makt.

Nahdem dat oostfreesch Fürstenhuus utstorven un dann Land vun de Preußen övernommen wurrn weer, wurr Ihering preußisch Beamter un Regierungsdirekter. Dorbit hett he de Finanzverhältnisse in Oostfreesland weer up Vördermann brocht. De Verwalten hett he strafft un hett an' Dullart noch en gewaltig Indieken vörnommen. Mit königlich Erlaubnis kunn he sogor noch ei´n Urbarmachungsedikt utstellen, dat sien Kultiveerungsarbeit up en rechtlich Grundlaag stellen de. He hett sück ok dorför insett, dat de oostfreeschen Eilannen befestigt un erhollen wurrd, wiel de levensnotwennig för Oostfreesland weern (un sünd).

Ihering weer mit Catherina Elisabeth Damm, Dochter vun en Böverstüerinnehmer ut Leer verheiraadt un is 1759 storven.

Born

• Martin Stolzenau in de Bilaag Friesische Heimat, Nr. 3 vun 5. Februar 2009, to'n Anzeiger für Harlingerland