Dat Sehestedter Moor an de Oostküst vun’n Jadebusen is dat eenzige Hoochmoor in Europa, dat direkt an dat apene Meer liggt. De Floten naagt överlangs grote un lüttjere Torfkluten (Dargen) vun den Rand af, avers noch hett dat Moor ene Grötte vun 15 ha, un siene Bavensiet liggt up + 3,40 NN so bi 3,21 m höger as de Weiden up de Binnensiet vun den Diek bi Sehestedt. Wiel Hoochmoor lichter is as Water, warrt dat bi Stormfloten vun dat Neddermoor, wat darünner liggt, avhaven. So wiet kummt dat avers eerst, wenn de Pegel över 3,26 m anstiggt.

Dat swemmem Moor vun Sehestedt weer fröher grötter un klapp faken hooch, dat heet, dat de Siet na’t Water to sik anhoov. Wo Moor un Land noch fasten Verbund harrn, keem en Knick tostannen, un so brook denn dat Water dör. Sietdem is dat Sehestedter Moor en swemmen Moor.

Dat Dorp Sehestedt is na den däänschen Admiraal Sehestedt benöömt. De däänsche König versett em um 1700 to’r Straaf as Landdrost na Ollnborg, wat domaals to Däänmark höör. Hier hett he sik as Diekbomester verdeent maakt. He bo den Moordiek an de Oostküst vun'n Jadebusen, de na fievjohrige Arbeit 1725 fertig weer.


Koordinaten:53° 26′ N, 8° 18′ O