Sexuelle Diversität in Belize
Dat Thema Sexuelle Diversität is in Belize mit en Reeg sellschopliche Tabus beleggt. Lesben, Swule, Bisexuelle un Transgender-Personen (LGBT) sünd in Belize in de Sellschop nich mit Nich-LGBT-Personen liekstellt. De Laag hett sik aver betert as de Böverste Gerichtshoff von Belize 2016 oordeelt hett, dat dat Verbaad von Homosexualität mank Mannslüüd gegen de Verfaten von Belize verstött.
Dat gifft in Belize keen Homo-Eh un ok keen Adopschoonsrecht för homosexuelle Poren.
Geschicht ännern
Belize hett en koloniale Vergangenheit, de von de Briten präägt is (Brietsch-Honduras). Dorüm hett dat Land Engelsch as Amtsspraak un en brietsch präägt Rechtssystem. De Naverlänner sünd all dör en spaansche Koloniaalvergangenheit präägt.
Traditschonell is Belize christlich. 40 % von de Inwahners sünd Katholiken un en groten Deel von’n Rest verdeelt sik ok en Koppel verscheden protestantsche Kunfessionen. Ofschoonst ok 16 % von de Inwahners gornich religiös sünd, speelt de Glöven doch en grote Rull för vele Lüüd in Belize.
Dat Straafgesettbook för Belize, dat de Briten an’n 15. Dezember 1888 inföhrt hebbt, hett sik in Paragraaf 53 an dat brietsche Sodomie-Gesett ut Paragraaf 61 von dat Offences Against the Person Act 1861 anlehnt. Paragraaf 53 hett Homosexualität ünner Straaf stellt un en Straaf von teihn Johr Haft androht, aver blots, wenn dat ünner Dwang passeert oder gegen den Willen von de Person.[1]
Mit de Ordinance No. 4 von 1944 is de Paragraaf reformeert worrn.[1] Dwang weer nu nich mehr vörutsett un tosätzlich is bestiality (also Verkehr mit Deerten) opnahmen worrn.[1]
Wieldes Grootbritannien in England un Wales mit dat Sexual Offences Act 1967 Homosexualität legaal maakt hett, hett dat kunservative Belize sien Gesetten behollen.[1]
De Text von de aktuellste (bet 2016) Form von Paragraaf 53 weer:
- Every person who has carnal intercourse against the order of nature with any person or animal shall be liable to imprisonment for 10 years.
- „Elk Person, de mit en Person oder en Deert Geslechtsverkehr gegen de natürliche Ordnung hett, schall mit 10 Johr Haft bestraaft warrn.“
Dör Paragraaf 53 weren blots Mannslüüd von Straaf bedroht. Sexuelle Aktivitäten mank Froonslüüd sünd nich as carnal intercourse ansehn worrn.
Tosätzlich hett dat en Gesett (Paragraaf 5(1) von dat Immigratschoonsgesett) geven, dat Homosexuelle ut dat Butenland verbaden hett, in dat Land intoreisen. Düt Gesett is aver to keen Tied würklich aktiv dörsett worrn.
Düsse Regeln sünd bleven, nadem Belize 1981 von Grootbritannien unafhängig worrn is.
In’n September 2010 sünd Caleb Orozco un de Organisatschoon United Belize Advocacy Movement (UNIBAM) gegen Paragraaf 53 vör Gericht tagen. An’n 10. August 2016 hett de Böverste Gerichtshoff von Belize ünner Richter Kenneth Benjamin oordeelt, dat Paragraaf 53 gegen de Verfaten verstött.
Dorgegen is de Regeren von Belize in Beropung gahn. De is aver an’n 30. Dezember 2019 von’n Caribbean Court of Justice aflehnt worrn.
Dormit weer Belize dat letzte Land in Middelamerika, dat noch en Straafgesett gegen Homosexualität harr. Gliektiedig is dat aver een von de eersten Länner mank de fröheren brietschen Kolonien in de Karibik, dat Homosexualität legaal maakt hett.[2]
In’n August 2017 hett dat de eerste offizielle Pride Week geven.
Gegen dat Inreisverbaad för Homosexuelle hett 2013 Maurice Tomlinson ut Jamaika klaagt (un dat lieke Gesett von Trinidad un Tobago).[2] Dat Oordeel is 2016 vör’n Gerichtshoff von de Karibische Gemeenschop fullen.[2] Dat Gericht hett de Klaag aflehnt, aver gliektiedig seggt, dat dat Land dat Gesett gornich anwennen dröff, von wegen dat sik dat Land in internatschonale Verdrääg op Regeln verplicht hett, de dat utsluut.[2]
Footnoten ännern
- ↑ a b c d Belize: Anti-Homosexuality Legal Provision Struck Down for First Time in Caribbean, The Law Library of Congress an’n 19. August 2016
- ↑ a b c d Norbert Blech: Belize: Homosexualität jetzt legal, queer.de an’n 10. August 2016