Silas Cayetano

Silas Charles Cayetano (* 20. September 1925 in Barranco; † 18. September 2010 in Belize-Stadt) weer en Schoolmeester, Beamten un Politiker (UDP) ut Belize.

Leven

Cayetano is 1925 as Söhn von Eustaquia Satuye un Pascascio Cayetano in ene Garifuna-Familie in Barranco (Distrikt Toledo, Brietsch-Honduras) boren. He harr twee Bröder un fiev Süstern. De Moder is doodbleven, as he twölv weer un he is denn bi de Süster von siene Moder, Henriqueta Satuye, wieder opwussen. Cayetano güng in Barranco op de St. Joseph Primary School un hett de School mit 14 afslaten. He is denn Monitor worrn un hett jüngere Schölers Ünnerricht geven. Bi dat Examen as Pupil-Teacher is he dat eerste Maal dörfullen, hett denn aver in dree Johr dat eerste un twete Examen as Pupil-Teacher maakt un denn ok dat eerste Klassenlehrer-Examen.

Cayetano keem mit sien Rekter nich good torech un hett sik denn na Progresso versetten laten. Dor hett he dat twete Klassenlehrer-Examen maakt. Von wegen dat he so good afsneden hett, hett he en Stipendium kregen, üm dree Johr op dat Mico Teachers Training College in Kingston (Jamaika) to gahn. Dat College hett he 1948 afslaten un keem denn trügg na Brietsch-Honduras. He weer Rekter von en ganze Reeg Scholen in dat ganze Land.

Cayetano hett denn aver den Beroop as Schoolmester opgeven un is Beamten in dat Department för Kooperativen un Genossenschaftsbanken in dat Ministerium för Bueree un Fischeree worrn. Üm sik över Genossenschaften wiedertobillen, weer he 18 Maand lang över en Stipendium an de Universität von Puerto Rico. Na disse Tied hett he mit Genossenschaften in de Distrikte Stann Creek un Toledo arbeidt. 1962 is he Assistant Registrar in dat Department för Kooperativen un Genossenschaftsbanken worrn un dorför na Belize-Stadt tagen. 1964 is he för een Johr an dat Loughborough College in Grootbritannien gahn un hett dor Cooperative Administration and Management studeert. In’n Januar 1971 is he as Nafolger von Charles Woods to’n Registrar befördert worrn, wat he bet September 1980 bleven is, as he in Rohstand gahn is. He weer ok Chief von dat Social Development Department. In’n Rohstand weer he as Utbiller för dat Fredenskorps aktiv.

In’n September 1977 harr Cayetano de Garifuna Cultural Association of Belize City mitgrünnt un weer de eersten dree Johr de Vörsitter.

Tosätzlich weer he Trustee von de United Democratic Party (UDP). In’n Oktober 1984 is he Maat von de Public Service Commission worrn un in’n Januar 1985 Justice of the Peace. Dat Amt in de Public Service Commission hett he aver al dree Maand later afgeven, as he för de Regerungspartei UDP Maat von’n Senaat von Belize worrn is. Dat is he bet 1989 bleven.

Von 1993 bet 1998 weer he Vörsitter von dat Belize Marketing Board.

Cayetano weer verheiraadt mit Evarista Cayetano (25. November 1934–11. Juni 2005), borene Kay, de he 1953 drapen harr, as he Rekter an de School in Progresso weer un se Schoolmeestersche. De beiden harrn veer Kinner. Een Dochter von Evarista un Silas Cayetano is Nellie Cayetano, verheiraadt Biles. Simone Biles is von ehre Steef-Grootmoder un Adoptivmoder Nellie groottagen worrn.

Cayetano is an’n 19. September 2010 na en Slaganfall doodbleven un liggt begraven op’n Lord Ridge Cemetery in Belize-Stadt.

Ehren

To Königin Elisabeth II. ehren Geboortsdag 1979 is he Member of the Order of the British Empire worrn.