Skipness Castle is en Borgruine in Schottland, de in de Neeg vun’t Dörp Skipness op de Oostsiet vun de Halfinsel Kintyre liggt.

De Ruin vun Skipness Castle in Schottland

De öllsten Dele vun de Borg sünd in de eersten Half vun’t 13. Johrhunnert boot worrn. Dat weer en groot rechteckig Steenhuus, wo to even Eer en grote Hall un Kellerrüüm binnen weern. Baven doröver weern Wahnrüüm ünnerbrocht. In’n Süüdoosten dorvun stünn en Kapell, man dorvun weer blots noch de Süüdmuur torüchbleven, de later denn in de Borgmuer mit inboot worrn is.

De Borg schall oorspünglich vun den Clanlord MacSween torüchgahn oder op sien Söhn Dugald, de 1261 de „Chapel St. Columba“ dicht bi an de Mönch vun de Abtei Paisley övergeven hett. Dat Johr dorop weer Skipness vun’n König Alexander III. an Walter Bailloch Stewart geven, de de Graaf vun Menteith weer. In de dorop folgenden Johrteihnten rund üm 1300 is de Borganlaag wieter fast maakt un utboot worrn, in de Form, de tomeist vundaag noch to sehn is. Aver dat is nich bekannt, wokeen de Bomeester vun de Borg weer.

De Binnenhoff vun’t Toornhuus ut sehn

Mit Utnahm vun en poor ne’ere Elementen, de in de lateren Johren to den Bo biföögt weern, stellt Skipness Castle en Borg dor, de tyypsch is vör dat westliche Schottland un de ok as castle of enceinte betekent warrt. Bi disse Bowies hangt de Verdeffenderen alleen vun een massige Borgmuer af, de in dissen Fall vun Toorns ünnerstütt warrt.

De Bedüden vun Skipness Castle hett wohrschienlich bannig nalaten, as dat Slott in Tarbert boot worrn is, wat 1325 vun’n König Robert the Bruce an den Clan MacDonald geven worrn is. Dorna hett Skipness noch fakener den Besitter wesselt. Wiel dat 16. Johrhunnert is de Borg noch mol düchtig ümboot worrn. Op de olen Muern in de Noordoosteck vun’n Bo weer to en nee Toornhuus opsett, dat vundaag noch existeert. De Borg is in’n Verloop vun’t 17. Johrhunnert aver opgeven un verlaten worrn. De Hüüs ümbi, de to de Anlaag höört harrn, sünd later in’t 18. Johrhunnert daalreten worrn, as de Binnenhoff vun Skipness Castle nu för de Veehtucht un de Bueree bruuklt warrn schüll. Man, de Hüüs vun disse Bueree sünd 1898 tonichten maakt worrn.

De Ruin vun Skipness Castle staht hüüt ünner staatlich Schuul. Dör Boanstalten schall dorför sorgt warrn, dat dat histoorsch Bowark bestahn blifft as dat is, un to glieken Tiet warrt över Informatschoonstafeln över de Historie vun’t Bowark künnig maakt. Skipness Castle is en Teel, wat geern vun de Touristen besocht warrt.

Weblenken ännern

  Skipness Castle. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:55° 46′ N, 5° 20′ W