Kintyre

Kintyre is en langtogen Halfeiland in’n Westen vun Schottland, dat in de Graffschop Argyll and Bute liggt.

Laag vun dat Halfeiland Kintyre in Westschottland

Översicht

Heidlandschap in Süüden vun Kintyre

Süüdküst mit Strand un Bargens.

Över Kintyre besteiht vun de britschen Eilannen ut de körtste Verbinnen na Noordirland. Man geiht vundaag ok dorvun ut, dat de eersten Siedlers vun’t irische Eiland – Jägers un later ok dör Buern – över dat Halfeiland Kintyre röverkamen sünd. Över de See is Irland blots 21 km wiet weg un liggt dormit in Sicht, wenn dat Weder dat tolaten deit.

Op dat karge Halfeiland sünd en poor vörhistoorsche Duns un Forts to finnen, as Carradale, Dun Skeig, Kildonan un Ranachan Hill, as ok de Clyde tombs vun Blasthill in de Neeg vun Southend. De gröttste Oort op Kintyre is de Stadt Campbeltown, woneem in’t scheedend 19. Johrhunnert de Middelpunkt vun’t Whiskybrennen wesen is. Vundaag is de Haven meist ahn Bedüden. Blots noch dree Whiskybrennereen gifft dat hier: Springbank, Glen Scotia un Glengyle. Jemehr Malts hebbt dör de Seeluft en sünnere Smackricht.

In’n Noorden vun Kintyre liggt op den Isthmus twüschen West un East Loch Tarbert de nöördlich Haven. De Noorden warrt ok Knapdale nöömt. Westlich vun’t Halfeiland leegt de Eilannen Gigha un Islay, de beid bewahnt sünd. Un in’n Oosten vun Kintyre liggt dat grote Eiland Isle of Arran.

In Vergliek to annere Rebeden vun Schottland leevt op Kintyre wenig Minschen un veel Arbeit is dor ok nich. Industrie is roor un ok de Bodden döögt nich veel för de Bueree. Man, Veehtucht is veel antodrapen. Sünners de jungen Lüüd maakt sik roor op dat Halfeiland, wiel de Utsichten för Arbeit un en Utkamen in de Gegend nich jüst dull sünd. Vör allen de Süüden wiest en feine Landschap op mit en sanftbargige Heidlandschap.

Buten vun Schottland is Kintyre vör allen dör sien Süüdspitz Mull of Kintyre („Mull“ bedüüdt „Vörbargen“) bekannt worrn. Över den Oort un sien Landschap hett Paul McCartney mit sien Grupp „Wings“ neemlich 1977 en Leed schreven, dat ok den Titel „Mull of Kintyrre“ harr. Op’n Klint vun’n Mull steiht en Lüüchttoorn un in de Neeg vun Southend gifft dat ok en Strandafsnitt. Man, na de Süüden vun Kintyre is nich so ganz licht hentokamen, as Southend al ruchweg 77 Stratenkilometer wiet vun Tarbert weg liggt.

Öörd op Kintyre

De beiden gröttsten Öörd vun Kintyre sünd Campbeltown mit ruchweg 5.400 un Tarbert mit ungefähr 1.400 Inwahners. Butendem gifft dat en Reeg vun lüttere Dörper as Bellochantuy, Carradale, Clachan, Drumlemble, Glenbarr, Grogport, Kilchenzie, Machrihanish, Muasdale, Peninver, Saddell, Skipness, Southend, Stewarton, Tayinloan un Whitehouse.

Verkehr

Bus un Iesenbahn

Mit de Iesenbahn kummt een bit Glasgow, vun dor kann man mit den Bus vun Scottish Citylink op dat Halfeiland Kintyre kamen. Man, dat is en düchtig langen Weg. Op Kintyre sülvst warrt vun West Coast Motors en Buslien bedreven.

Flaagverkehr

Campbeltown hett en Regionalflaaghaven, de Verbinnen na Glasgow hett.

Schippverkehr

Twüschen Kintyre un de Eilannen ümto gifft dat verscheeden Fährlienen vun de Caledonian MacBrayne:

• Campbeltown - Ballycastle in Noordirland (blots in’n Sommer)
• Claonaig - Lochranza op Arran (blots in’n Sommer)
• Kennacraig - Islay
• Tarbert - Lochranza
• Tarbert - Portavadie
• Tayinloan - Gigha

Weblenken

• Traveline Scotland - Verkehrsutkunft (engelsch)