Slavery Abolition Act

De Slavery Abolition Act 1833 (citation 3 & 4 Will. IV c. 73) is en Gesett, de dat Parlament vun dat Vereenigt Königriek vun Grootbritannien un Irland 1833 rutgahn laten hett. Dor is de Slaveree in de meisten Länner vun dat Brittsche Empire mit afschafft wurrn, man mit de Utnahmen vun „de Länner, de in'n Besitt vun de Oostindische Kompanie sund, vun de Insel vun Ceylon un vun dat Eiland vun Sankt Helena“ Dat Gesett is 1998 torüchnahmen wurrn, as dat Engelsche Gesett wiethen up Schick bröcht wurrn is, man latere Gesetten gegen de Slaveree sünd in Kraft bleven.

Achtergrund

Grootbritannien harr al 1807 dat Slaven-Hannelsgesett beslaten un dor den Hannel mit Slaven dör verbaden. Jedeen brittschen Kaptein, de Slaven inföhren dö, möss en Straaf vun 100 Pund Sterling för jeden Slaven betahlen. Man dat hett den brittschen Slavenhannel nich to Enn bröcht: Wenn Slavenscheepe in Gefohr weern, dat se vun de Royal Navy upbröcht wurrn, denn harrn de Kapteins Order kregen - un dat weer bekannt - se schollen de Slaven in de See smieten, denn mössen se nich so veel betahlen. Ok in de USA is de Hannel mit Slaven to desülvige Tied afschafft wurrn, as in England (man bloß de Butenhannel mit Slaven, nich de Hannel in dat Land sülms). Man nu sünd de Portugesen bigahn un hefft den Slavenhannel utboot, grötter, as he jemols ween weer. De welken Briten hefft dor nu nich lang tögert un bi de Portugesen ehrn Hannel mitmaakt un sünd, unner Schuul vun ehre Flagg, ehre Mackers wurrn.

Nu möss dat wieter gahn un de Slaveree möss ganz afschafft weern. De eerste Anti-Slaveree-Sellschop in in dat Vereenigte Königriek 1823 grünnt wurrn. Tein Johre later is denn de Slavery Abolition Act 1833 rutkamen. 1839 is en Organisatschoon grünnt wurrn, de de Nafolger vun de Anti-Slaveree-sellschop wurrn is. De ehr offiziellen Naam weer The British and Foreign Anti-Slavery Society (De Brittsche un Utlannsche Anti-Slaveree-Sellschop). Se harr sik vörnahmen, datt Slaveree in de ganze Welt af schafft weern scholl. Düsse Sellschop besteiht noch hüdigendags unner den Naam Anti-Slavery International.