Speelfilm

As Speelfilm warrt en Film mit en utdachten Inholt betekent, de mitünner ok op wohre Begeevnissen oder Personen baseeren kann, un vör allen för’t Wiesen in Kinos vörsehn is. De Speelfilm is dormit vun annere Filmstilen aftogrenzen as to’n Bispeel vun’n Dokumentarfilm, vun’n Warffilm un vun Filmen, de to’n Berichterstatten dreiht worrn sünd.

Kunzept

Speelfilmen warrt normalerwies mit de Middel un Warktüüch vun de Filmdramaturgie op de Grundlaag vun en Dreihbook opnahmen. Disse Filmen maakt den wiet gröttsten Deel vun de Filmen ut, de in Kinos wiest warrt. Se warrt in en grote Tall Filmstilen oder -genres indeelt. Filmen de aleen oder för allen för’t Feernsehn dreiht warrt, warrt normalerwies nich as Speelfilmen betekent, man as Feernsehfilmen.

In’n düütschen Spraakruum warrt af un to ok vun Filmen „in Speelfilmläng“ snackt, sünners in’n Tosamenhang mit enkelte Folgen vun en Feernsehreeg. Dat kann aver verkehrt verstahn warrn, dat een meent, de Duer vun en fiktionalen Film weer den Utslag geven, dat he Speelfilm heten dröff. Meent is dormit aver blots, dat de gröttste Deel vun Speelfilmen en Duer vun 90 Minuuten oder mehr hebbt, wiel enkelte Episoden vun Feernsehregen normalerwies körter sünd.

Internatschonale Situatschoon

De internatschonale Markt vun’t Filmgewarf warrt düütlich vun de vun US-amerikaanschen Filmsellschoppen produzeerten Speelfilmen beherrscht. In grote Tall warrt ok in Indien Speelfilmen herstellt, man vör allen för den natschonalen Markt (kiek ok: Bollywood).

Situatschoon in Düütschland

Ünner de Länner mit en langen Speelfilmhistorie is ok Düütschland. Ut de eersten Tiet, Anfang vun’t 20. Johrhunnert, sünd vör allen Filmen vun Fritz Lang un Friedrich Wilhelm Murnau vun Bedüden, de as Bispelen vun’n expressionistischen Film ok internatschonal Filmhistorie schreven hebbt. To de Tiet vun’n Natschonalsozialismus müssen vele bedüdene Filmspeelbasen in’t Utland utwannern, un de weltwiete Bedüden vun düütsche Speelfilmprodukschonen weer dormit vörbi. An de spoodrieke Traditschoon künn eerst Johren later wedder de düütsche Autorenfilm anknütten mit Speelbasen as Volker Schlöndorff, Rainer Werner Fassbinder un Wim Wenders, ok wenn de Spood vör allen „blots“ bi de Filmkritikers un bi’t Verlehen vun Filmpriesen düütlich warrn de. Weertschopplich weer de internatschonale Spood vun düütsche Speelfilmen ok in de Johren dorna blots op wenige Filmen begrenzt, as to’n Bispeel Das Boot oder Lola rennt.

Anners as bi de Situatschoon in de USA speelt de Feernsehanstalten bi de Produkschoon vun Speelfilmen traditschonell en grote Rull. Dat gellt nich blots för Produkschonen, de as Feernsehfilm blots för’t TV-Utstahlen herstellt warrt, man ok för Kinoprodukschonen, an de Feernsehanstalten bedeeligt sünd.

Kiek ok

• Filmkunst
• Düütsche Filmhistorie

Weblenken

• http://www.rechercheportal.de/dc/film.php (grote Sammlung vun kostenlose Filmdatenbanken)
• http://german.imdb.com (IMDb: Datenbank vun Filmen un Dorstellern)
• Düütsche Filmklassiker vun’n Progress Film-Verleeh in düütsche un engelsche Faten