Stellingwarven
De Stellingwarven (ok Stellingwarf, up nedderl.: Stellingwerven), sünd en Landstreek in den Süüdoosten vun de Provinz Freesland in de Nedderlannen. Se liggt in'n Süden vun de Tjonger Beeke un ünnerscheedt sik vun den Rest vun de Provinz, vunwegen dat dor to'n gröttsten Deel nich Freesch snackt warrt, man en nedderlandsch-neddersassischen Dialekt, dat Stellingwarfs.
Vunwegen Regeern un Verwalten sünd de Stellingwarven updeelt in de beiden Gemeenden Ooststellingwarf un Weststellingwarf. Mit de Gegenden dor ümto höört se to de Freeschen Woolden. In dat Grenzgebiet vun Drenthe un Freesland liggt hier de Nationaal Park Drents-Friese Wold.
Wat de Politik angeiht, wennt sik de Landstreken mehr na links un na de PvdA as de Dörsnitt vun de Provinz. Vun hier stammt ok de Politiker Jeltje van Nieuwenhoven vun de PvdA. De erste Politiker ut de Stellingwarven, de in de ganzen Nedderlannen en Rull speelt hett, weer Anne Vondeling ut Appelscha.
De wichtigsten Öörd in de Stellingwarven sünd Wolvege, Oosterwoolde, Appelscha, Noordwoolde un Stienwiek.
Historie
ännernWo de Stellinwarvers an un for sik herkaamt, is nich mit Sekerheit to seggen. Dat gifft en Geschicht, dat se üm 840 rüm vör en vun de Enkelsöhns vun Karl den Groten ut de Gegend in'n Süden vun Hannober hierher utknepen sünd.
De Naam Stellingwarf is to'n eersten Mol in dat Johr 1309 to hören. Warf betekent: „Platz, wo Recht spraken warrt“ un stelling betekent: „Regent“. Stellingwarf is vun dree Stellingen regeert wurrn, de jedet Johr wählt wurrn sünd. Vun 1309 bit 1504 weern de Stellingwarven an un for sik en unafhängige Buernrepublik, de Vrije Republik der Stellingwerven. Vördem hören se na dat Oversticht (hüdigendags Drenthe un Oaveriessel) to un harrn to hören up den Bischop vun Utrecht. Dat is hüdigendags nich mehr bekannt, worüm sik de Stellingwarven vun Drenthe losmaakt hefft un up wat vun Oort dat passeert is. Up jeden Fall föhren Drenthe un Freesland in de doren Tieden faken Krieg gegen'nanner. In dat Johr 1504 sünd de Stellinwarven Deel vun Freesland wurrn. 1517 sünd se denn in twee Delen updeelt wurrn: Ooststellingwarf en Weststellingwarf.