Filmdaten
Plattdüütsch Titel:
Originaltitel: Stormy Monday
Düütsch Titel: Stormy Monday
Produkschoonsland: USA
Grootbritannien
Johr vun’t Rutkamen: 1988
Läng: 93 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Mike Figgis
Dreihbook: Mike Figgis
Produkschoon: Nigel Stafford-Clark
Musik: Mike Figgis
Kamera: Roger Deakins
Snitt: David Martin
Szenenbild: Andrew McAlpine
Kledaasch: Sandy Powell
Dorstellers

Stormy Monday (op plattdüütsch so veel as „Stöörmsch Maandag“) is de Titel vun en britisch-amerikaanschen Kriminal-Thriller ut dat Johr 1988 na Oort vun en Film noir. De Film weer de eerste Kinofilm vun den fröheren Rockmusiker Mike Figgis un speelt in de Stadt Newcastle.

Inholt ännern

De wrede texaansche Gewarfsmann Cosmo un sien Mafiamackers hebbt den Plaan dat Havenveerdel vun de engelschen Stadt Newcastle, dat teemlich rünnerkamen is, mit en groot anleggte Grundstückspekulatschoon luxuriös to saneren. Üm dorför de richtige Stimmung to tügen, warrt in de noordengelschen Havenstadt mit Hülp vun korrupte eenheimsche Politikers en „Amerikaansche Week“ fiert. Cosmo un de Lüüd in’n Achtergrund haapt sik vun de Spekulatschoon en gresigen Profit. Man, üm den Plaan ümtosetten, bruukt se dat Grundstück, op dat de Key Club vun den Musikkenner Finney steiht. De aver will dorvun nix weten. Sien lütten Club löpt goot un he will em nich verköpen.

Siet korte Tiet arbeit bi Finney de verdröömte irische Jazz-Fan Brendan, de in den Club reinmaken deit aver ok annere lütte Jobs övernimmt. To’n Bispeel halt he de Free-Jazz-Grupp „Krakow Jazz Ensemble“ ut dat poolsche Krakau vun Flaaghaven af, de en Dag to fröh ankamen sünd aver nich dör’n Toll laten warrt vunwegen dat se keen Verdrag vörwiesen künnt. In en Inkoopszentrum stött he ut Versehn mit Kate tosamen. Kate is de fröhere Leefste vun Cosmo un stammt ut Minnesota. Se dröömt vun en Loopbahn as Schauspelersche un warrt vun Cosmo jümmer noch as „Hostess“ insett. De beiden jungen Lüüd verkiekt sik in’nanner.

Bito arbeit Kate in Weegee’s Bar, woneem se kellnert. Dor höört Brendan dör en Tofall vun Cosmo sien Mackers Patrick un Tony, dat se Finney mit Gewalt dorto bringen wüllt, den Verdrag to ünnerschrieven. He vertellt Finney dorvun un bringt Cosmo sien Plaan dormit dör’nanner. Dormit bringt he aver ok sik sülvst un Kate in grote Gefohr. Op eenmol kriegt se mit Gewalt un Terror to doon. Bi en Party mit de poolschen Jazz-Grupp un poolsche Inwannerers stellt sik rut, dat ok Kate ehr Vadder ut Polen stammt. Op de Fohrt torüch warrt se bi starken regen verfolgt un överfallen. Een vun de beiden Lüüd kann Brendan dootscheten. De Liek warrt von Cosmo sien Lüüd an de Siet maakt, üm keen Schandaal to kriegen.

Man, kort later kummt dat to en Anslag mit en Autobomb. Brendan un Kate kamt mit Glück dorvun af. Se verleht dat Auto an een vun de poolschen Musikers un sien Deern de he jüst afsleept hett. So starvt de beiden an jemehr Steed. Nu kummt dat to en Op’nannerdrapen twüschen Cosmo un Brendan, de den Texaner mit en Pistool bedraut. Blots Finney sien Tosnacken hollt em opletzt dorvun af to scheten, wobi Kate anmarken deit, dat Cosmo Glück hatt hett, dat nich se de Pistool in de Hand harr. Se harr neemlich afdrückt. Finney maakt Cosmo kloor, dat he de Stadt verlaten un mitsams sien Lüüd nie wedder torüch kamen schall.

Kritik ännern

  • De film-dienst schrifft vun dat Bild vun den Utverkoop vun en inst grote Weertschopsmetropole, dat mit Ironie tekent warrt. Mit Genrebiller vull Stimmung warrt dat to en handfaste Verbrekergeschicht verbunnen, de nich jümmer to en övertügen Eenheit finnt.

Utteken ännern

De Film weer för dree Filmpriesen vörsehn, vun de he opletzt een wunnen hett, neemlich den Sünnerpries vun’t Mystfest.

Weblenken ännern