Strathisla

Strathisla is en Whisky-Brenneree in Keith, Moray, Schottland. Se ist siet 1995 in’n Besitt vun Chivas Brothers Ltd. för Pernod Ricard. De Brenneree is de öllste Speyside-Destille, de hüüt noch bedreven warrt. De Naam kummt vun den Stroom Isla, de in de Neeg vörbilöppt. De Hüüs vun de Brenneree sünd in de schottischen Denkmollisten in de hööchste Kategorie A inordent.^[1] De Destille kann vun’n 21. März bit Enn vun’n Oktober för Besökers in föhrte Touren besöcht warrn.

Strathisla
Brenneree Strathisla
Land	Schottland
Region	Speyside
Tyyp	Malt
Status	aktiv
Besitter	Pernod Ricard
Grünnt	1786
Grünner	George Taylor & Alexander Milne
Architekt	John Alcock
Waterborn	Broomhill Spring
Washstill(s)	2
Spiritstill(s)	2
Produkschoonsvolumen	2.400.000 l

Historie

De Destille Strathisla is 1786 vun George Taylor un Alexander Milne grünnt worrn, dormols noch ünner den Naam Milltown oder Milton. Se weer 1830 vun William Longmore övernahmen. Ehrn hüütigen Naam Strathisla hett se in de 1870er Johren kregen. Ruchweg söss Johren later is en Füür utbroken, wat en groten Deel vun de Brenneree tonichten maakt hett. 1890 weer de Destille in Milton ümnöömt.

George Jay Pomeroy weer 1949 de Besitter vun de Brenneree. He müss in’t Gefängnis, vunwegen dat he sien Stüürn nich betahlt harr. Dormit hett he ok de Brenneree in Gefohr bröcht. De Firma Chivas Brothers Ltd. hett ehr bi en Aukschoon opköfft un geev ehr den Naam Strathisla torüch. 1965 sünd twee ne’e Brennblasen dorto kamen. 1995 is Chivas vun Pernod Ricard övernahmen worrn^[2].

Produkschoon

De Destille

De Strathisla-Destille höört to dat schottische Whiskyrebeet Speyside. Dat Water vör de Produkschoon stammt ut de Broomhill Spring in de Neeg vun de Brenneree. Arbeit warrt dor mit en Meeschfatt ut Eddelstahl vun 4,84 t un ölven Gäärfatten to 24.500 l ut Douglasienholt. Brennt warrt in twee wash stills un twee spirit stills. De Whisky warrt denn in Bourbon- un Sherry-Fatten lagert. Mit 2.400.000 l in’t Johr tellt se to de lütteren Destillen an’n schottischen Whisky Trail^[3].

En groten Deel vun de Produkschoon geiht in de Herstellen vun den Blend-Whisky Chivas Regal. Dat Hööftprodukt is de 12 Johr olle Single Malt, man dat gifft bito ok Single Malts in’t Öller vun 8, 18 un 21 Johren.

Kiek ok

List vun de schottischen Brennereen

Borns

↑ Indrag bi Historic Scotland.
↑ Informatschonen to de Destille (engelsch)
↑ Misako Udo: The Scottish Whisky Distilleries. Black & White Publishing, Edinburgh 2006. ISBN 1-845-02130-4

Weblenken

Strathisla. Mehr Biller, Videos oder Audiodateien to’t Thema gifft dat bi Wikimedia Commons.

Koordinaten:57° 33′ N, 2° 57′ W

[1] Indrag bi Historic Scotland.

[2] Informatschonen to de Destille (engelsch)

[3] Misako Udo: The Scottish Whisky Distilleries. Black & White Publishing, Edinburgh 2006. ISBN 1-845-02130-4

[1]

[2]

[3]