Swachhusen (Bremen)

Stadtdeel vun Bremen Swachhusen

Wat to seggen is		Rang
Flach:	8,775 km²	16/23
Inwahners:	37.372	4/23
Inwahnerdicht:	4259 Inwohners/km²	5/23
Andeel Butenlänners:	7,0 %	18/23
Arbeitslosenquoot:	10,4 %	19/23
Wannehr:	Midde 2005
Ortsdelen:	Nee-Swachhusen Börgerpark Börgerweid-Barkhoff Riensbarg Radio Bremen Swachhusen Geete
Website:	Ortsamt Swachhusen
E-Mail-Adresse:	office@oaschwachhausen.bremen.de

Swachhusen (hoochdüütsch Schwachhausen) is en vun de 19 Stadtdelen vun Bremen un en Oortsdeel in düssen Stadtdeel.

Stadtdeel Swachhusen

De Stadtdeel sett sik hüdigendags tohopen ut de Oortsdelen Swachhusen, Riensbarg, Börgerpark, Börgerweid-Barkhoff, Gete, Radio Bremen un Neeswachhusen.

Historie

In dat Johr 1159 is to'n eersten Mol in en Urkunn de Naam Swechusen to lesen. De Naam kümmt womöglich vun en Mann mit Naam Seveco her, de dor sien Wohnsteed harr. Dormols leeg dat Dorp tämlich verstreiht in de Gegend, wo hüdigendags de Swachhuser Heerstraten, de Swachhuser Ring, de Bökenstraten un de Emmastraten langs loopt. Swachhusen weer en Buerndörp un höör to den Vaagt vun Landwedel sien Amtsbezirk. Düsse Vaagt hett en Unnervaagt up en Hoff in Swachhusen harrt. Herr över dat Land weer Arzbischop vun Bremen. 1648 hefft de Sweden de Herrschop vun den Arzbischop övernahmen. Se hefft Swachhusen denn an den königlichen Liefdokter Cleberfeldt as Gootsherr övergeven. 1681 keem Swachhusen denn an de Kroon vun Sweden torüch. 1719 keem dat Dörp an Hannober un eerst 1803 is dat en Deel vun Bremen wurrn. Vun 1815 af an harr de Bremer Landherr dor dat Seggen. Wat de Kark angeiht, so höör Swachhusen toeerst to dat Kaspeel Arbargen. In dat Johr 1596 kemen de Reformeerten na de Bremer St.-Remberti-Gemeende.

In de tweete Hälft vun dat 19. Johrhunnert hett Swachhusen denn en anner Gesicht kregen un is to en Vörstadt vun Bremen wurrn. An de Swachhuser Chaussee oder Heerstraten sünd grote Villen boot wurrn un in de Sietenstraten gröttere Regenhüser för de Börgers, de sik goot stünnen. 1902 is Swachhusen Deel vun de Stadtgemeende Bremen wurrn. 1951 is de Oort Swachhusen, tohopen mit de annern Oortsdelen, to'n Stadtdeel Swachhusen verklaart wurrn.

Oortsdeel Swachhusen, Prager Straat

Inwahners

1813 leven in Swachhusen 206 Inwahners, 1855 weern dat 397 Inwahners, 1885 weern dat al 1223, 1905 leven 3646 Lüde in Swachhusen un 1939 weer de Tall anwussen up 15.650 Inwahners. In den ganzen Stadtdeel leven 1975 40.325 Inwahners, in den Oortsdeel 4.028. 1999 weern dat bloß noch 36.278 in den Stadtdeel un 3.838 in den Oortsdeel.

Bremer Stadtdelen un Oortsdelen