Talara (Stadt)

Talara is en Havenstadt an’n Pazifik in’n Distrikt Pariñas, Provinz Talara, Departamento Piura, in’n Noordwesten von Peru. Stand 2005 harr se 84.373 Inwahners.

Blick över Talara

Geografie

Talara liggt temlich wied in’n Westen von Süüdamerika, blots de Oort Negritos un dat Kap Punta Pariñas doot noch wieder in’n Westen liggen.

De eenzigen Öörd in de dichtere Ümgegend sünd Lobitos in’n Noorden un Negritos in’n Süüdwesten. Dat Binnenland is meist kumplett unbewahnt. De Oort El Alto in’n Noorden is al üm un bi 50 Kilometer wied weg un de nächsten Öörd in dat Daal von’n Río Chira doot ok över 50 Kilometer wied weg in’n Süüdoosten liggen.

Dat Klima in Talara is hitt un temlich dröög. De Stadt liggt in dat Rebeed, dat von’n El Niño besünners stark bedrapen is.

Historie

Talara weer en lütt Fischerdörp, bevör dor in dat 19. Johrhunnert Eerdööl fördert worrn is. Sietdem is ut Talara en Industriestadt worrn, de to’n allergröttsten Deel op de Eerdööl-Weertschop baseert.

Von 1942 bet 1944 hebbt de USA bi Talara en Stüttpunkt bedreven, üm de Pazifikküst gegen U-Bööd von de Assenmächt to schulen. Blots en Funkstatschoon is noch bet 1947 bleven. Ut den Stüttpunkt is later de Flegerhaven Talara worrn. Tosätzlich gifft dat in de Neegd von’n Flegerhaven ok noch de Militärflegerhaven El Pato.

Kultur

Sport

De wichtigste Footballvereen ut de Stadt is Atlético Torino.

Weertschop un Infrastruktur

Verkehr

Von Talara loopt Straten na Lobitos un Negritos un na de PE-1, de en poor Kilometer in’n Oosten von de Stadt langslöppt. De PE-1 is Deel von de Panamericana.

Von wegen dat de Region blots dünn besiedelt is, is ok de Flegerverkehr över’n Flegerhaven Talara besünners wichtig.

För de Weertschop is ok de Haven von Talara von Bedüden.

Weblenken

Talara (Stadt). Mehr Biller, Videos oder Audiodateien to’t Thema gifft dat bi Wikimedia Commons.

• Websteed von de Stadt (spaansch)