Tölke

Tölke (ok Töleken, Tölcke , Tolcke, Tolke un Thölke) is een plattdüütschen Vörnaam för Jungs.

Herkamen

Dat warrt annahmen, de Naam hett wat mit den germaanschen Naam Berthold oder Barthold to kriegen. Düsse Naam sett sik ut de twee oolthochdütschen Wöör beraht - "glinsterig, beröhmt" und waltan - , "regeeren" tosamen. As dat bi de Lüde begäng weer, de Plattdüütsch snacken döen, hefft se düsse Wöör tosamentrocken un afkört to: Toll- oder Tolle. Dor is denn noch dat Anbacksel (Suffix) -ike anbackt wurrn (Diminutiv). So keem de Naam Töliken tostann. Later is dar denn Tölke vun wurrn.

Fundöörd

In de vörmaligen Dörper vun dat Landgebiet vun Bremen findt sik de Naam bit in dat 19.Jahrhunnert faken. Besunners up de lunke Siet vun de Werser, in Orssen, in Habenhusen, in Huchting un in't Neenland weer de Naam begäng. In't 20. un 21.Jahrhunnert gifft nich mehr veel Jungs un Mannslüde, de so heten doot. In ole Listen oder Urkunnen finnt sik de Naam

1603 in Neenland (Töleken)
1609 in Habenhusen (Tolke)
1666 in Neenland (Tolcke)
1690 in Habenhusen (Tölcke)
1850 in Orssen (Tölke un Thölke)
1866 in Habenhusen (Tölke)
1885 in Orssen (Tölke)
1925 in Orssen (Tölke)

Dörpsnaam

Bi dat Dörp Moordiek, wat hüdigendags to de Gemeende Stuhr tohören deit, gifft een lüttjet Dörp, dat heet Tölkenbrugg. Is antonehmen, dat dor mal een Buur mit Naam Tölke een Brugg öber'n Graven boot hett.

Familiennaam

De düütsche Familiennaam Thölke oder Thölken (ok Tölke un Tölken) kümmt woll vun düssen Vörnaamen her un bedutt so veel, as : Ut Tölke sien Familie.

Snacks

In'n Bremen geev dat fröher de Snacks: „Dat weet Tölke vun'n Neenlanne ok “ un „Dat mag Tölke vun'n Neenlanne woll ok, un de is man lecker“. De eerste schull bedüden: Wat du mi vertellst is so oolt, dat weet ok de Buurn vör de Stadt al. Un de tweede bedutt: Dat kann een würklich eten, wat du mi hier vörsetten deist.

Kiek ok na bi

List vun plattdüütsche Vörnaams

Weblenken

Wofaken un woneem de Vörnaam in Düütschland vörkummt: Tölke, Toelke, Thölke, Töleken

Böker

Hermann Tardel, Bremen im Sprichwort, Reim und Volkslied, Bremen, 1947 (mit Snacks öber Tölke)
Hermann Frese, Habenhausen, Bremen, 1986 (Mit ole Inwahnerlisten mit den Naam Tölke vun dat 17. bit 19. Jahrhunnert)
Hermann Frese, Alt-Arsten, Bremen, 1987 (Mit ole Inwahnerlisten)
Hartmut Müller, (Rutgever): Peter Koster, Chronik der Kaiserlichen Freien Reichs- und Hansestadt Bremen 1600-1700, Bremen 2004, ISBN 3-86108-687-5