The Big Kahuna
The Big Kahuna (op plattdüütsch so veel as „De grote Kahuna“) is de Titel vun en US-amerikaansch Filmdrama mit Kummedie-Elementen ut dat Johr 1999. Speelbaas weer John Swanbeck, dat Dreihbook stammt vun Roger Rueff, de dat na sien egen Theaterstück Hospitality Suite schreven hett.
| Filmdaten | |
|---|---|
| Plattdüütsch Titel: | — |
| Originaltitel: | The Big Kahuna |
| Düütsch Titel: | The Big Kahuna |
| Produkschoonsland: | USA |
| Johr vun’t Rutkamen: | 1999 |
| Läng: | 87 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | John Swanbeck |
| Dreihbook: | Roger Rueff |
| Produkschoon: | Elie Samaha Kevin Spacey Andrew Stevens |
| Musik: | Christopher Young |
| Kamera: | Anastas N. Michos |
| Snitt: | Peggy Davis |
| Szenenbild: | Kalina Ivanov |
| Kledaasch: | Katherine Jane Bryant |
| Dorstellers | |
| |
Inholt
ännernDe beiden Marketing-Vertreders Larry Mann un Phil Cooper warrt vun jemehr Firma na Wichita schickt, üm dor in en Hotel-Suite an en Messe deeltonehmen. Se schüllt dor en wichtigen Hannel op’n Weg bringen mit en Gewarfsmann, de as „De grote Kahuna“ betekent warrt. Larry is en Zyniker, de ahn Bedacht un ahn en Blatt för den Mund to nehmen op annere insnacken deit. Phil dorgegen is en ölleren Kerl, de dat Leven un de Arbeit över hett. Mit jem tosamen is to’n eersten mol ok Bob Walker ut dat Forschungs-Afdeel na Wichita schickt worrn, en eernsten jungen Mann, de’n bannig fasten Gloven hett un vun all Sünnen wegblifft.
De dree arbeit för de industrielle Smeermiddel-Industrie. Wiel se op de Gäst töövt kamt se in’t Snacken, wobi Larry jem ahn Ünnerbreken mit smuddige Dööntjes un fiese Fragen vullsabbelt. Tomeist wennt he sik dorbi gegen den jungen Bob. Bob warrt denn ok, ofschoonst he nix drinken deit, an de Bar stellt, as de exklusive Party losgeiht. Man de Gewarfsmann, op den se egentlich töövt hebbt, de grote Kahuna neemlich, kummt nich.
De dree överleggt, wat se doon künnt. Wiel Bob nich recht versteiht, worüm dat egentlich geiht, maalt Larry sik de Tokumst düster ut, vunwegen dat jem de wichtigste Hannel för jemehr Ünnernehmen dör de Lappen gahn is. Se fangt an, över den Sinn vun’t Leven natodenken. Dorbi stellt sik rut, dat de grote Kahuna doch dor weer. Utrekent mit Bob hett he sik ünnerhollen, un dat över sien Hunnen un över Religion, vunwegen dat een vun sien Hunnen jüst doodbleven weer. Blots dat Bob nich weten hett, dat he de Mann weer, op den Larry un Phil töövt hebbt.
Dat stellt sik rut, dat de Gewarfsmann noch op en private Party gahn wull, un dat he Bob en Inladungskoort in de Hand drückt hett. Bob warrt also dorhen schickt, üm Kuntakt mit em optonehmen. He schall em de Visitenkorten vun Larry un Phil övergeven un geiht opletzt ok los. Phil un Larry blievt alleen torüch un ünnerhollt sik wieter över dat Leven un private Saken.
As Bob torüchkummt vertellt he, dat he sik mit den groten Kahuna över Jesus Christus ünnerhollen hett. Jemehr Smeermiddelprodukten keem in de Diskusschoon aver nich vör, wat Larry teemlich bramstig maakt. Se kriegt sik jümmer mehr in de Hoor, vun wegen dat Larry blots dat Gewarf in’n Kopp hett un dat för wichtiger hollt, as Bob sien Gloven. Phil is dat opletzt, de de Laag oplööst un Larry to verstahn gifft, dat se ok ahn den Hanneln wieter leven warrt. Larry sütt in, dat he överdreven hett. As he na Bett gahn is, sett Phil ok den jungen Bob den Kopp torecht.
De letzte Szeen wiest Larry as he na’t Utchecken Bob in’t Foyer finnt, as he jüst wedder mit den frömmen Gewarfsmann snackt. De beiden kiekt sik mit en Smuustern an.
Kritiken
ännernRotten Tomatoes schreev, dat de Film en feine Ümsetten vun dat Theaterstück weer. Dat Speel vun Spacey, DeVito un Facinelli weer as inspireert betekent.[1]
Dat Lexikon vun’n internatschonalen Film beteken den Film as en staatsche Theaterverfilmen in de Form vun en torüchhollern Kamerspeel. De Geschicht weer vun de go’en Dorstellers dragen un hannel vun Fragen över Fründschop, Vertroen, Levensmoot un -angst as ok vun Glovensfragen, wat in den Film dorstellt warrt, ahn dat Twievel an de Wohrhaftigkeit opkamt.[2]
Utteken
ännernDe Film hett keen Filmpries afkregen, man Roger Rueff weer in’t Johr 2000 för den Humanitas Prize vörslahn.
Achtergünnen
ännernDe Film is in New York City un in Wichita (Kansas) dreiht worrn.[3] De Weltpremiere weer an’n 16. September 1999 op dat Toronto International Film Festival. An’n 24. November 2000 weer he bi’t Oslo International Film Festival wiest.[4] De Film hett in de Kinos vun de USA ruchweg 3,15 Millionen US-Dollar inspeelt.[5]
Borns
ännern- ↑ uk.rottentomatoes.com, afropen an’n 6. November 2007
- ↑ Kritik in’t Lexikon vun’n internatschonalen Film afropen an’n 6. November 2007
- ↑ Filming locations för The Big Kahuna, afropen an’n 6. November 2007
- ↑ Premierendaten för The Big Kahuna, afropen an’n 6. November 2007
- ↑ Box office/business för The Big Kahuna, afropen an’n 6. November 2007
Weblenken
ännern- The Big Kahuna in de Internet Movie Database (engelsch)
- Kritiken to’n Film op Rotten Tomatoes
- Sammelte Kritiken op Metacritic.com