The January Man
| Filmdaten | |
|---|---|
| Plattdüütsch Titel: | — |
| Originaltitel: | The January Man |
| Düütsch Titel: | Im Zeichen der Jungfrau |
| Produkschoonsland: | USA |
| Johr vun’t Rutkamen: | 1989 |
| Läng: | 93 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Pat O’Connor |
| Dreihbook: | John Patrick Shanley |
| Produkschoon: | Norman Jewison Ezra Swerdlow |
| Musik: | Marvin Hamlisch |
| Kamera: | Jerzy Zieliński |
| Snitt: | Lou Lombardo |
| Szenenbild: | Philip Rosenberg |
| Kledaasch: | Ann Roth Neil Spisak |
| Dorstellers | |
| |
The January Man (op plattdüütsch so veel as „De Januar-Mann“; dt. Titel: Im Zeichen der Jungfrau) is de Titel vun en US-amerikaanschen Thriller ut dat Johr 1989, in den Kevin Kline de Hööftrull speelt hett.
Inholt ännern
Siet eenige Maanden al drifft sik in New York City en Regenmöörder rüm, de dat op Fronslüüd afsehn hett, de alleen wahnt. Ölven hett he al an de Siet maakt, man de Polizei hett afsluut keen Spoor.
In de Neejohrs-Nacht passeert de nächste Moord. Ditmol is dat Opper en go’e Fründin vun Bernadette Flynn, de Dochter vun den Börgermeester vun New York, Eamon Flynn. De sett den Polizeibaas, Frank Starkey, bannig to. Ünner den Druck vun’n Börgermeester blifft em blots een Utweg: He mutt sien Broder Nick üm Help anfragen, de fröher al bi de Polizei arbeit hett aver vun em wegen sien unorthodoxen Methoden suspendeert worrn is. Intwüschen arbeit Nick as Ex-Profiler-„Hippie“-Star-Füerwehrmann. De Politikers halt em mit veel Medien-Tamtam torüch in den aktiven Deenst un schuuvt em af na den gnatterigen Captain Vincen Alcoa, de em noch vun fröher kennt. Nick hett aver all Freeheiten. He richt sik en Büro na sien egen Verschääl her, bringt sik en Assistenten (Ed) mit un fraagt na ungewöhnlich Material, üm sien Fall to bearbeiten. Bi de Ünnersöken draapt sik Bernadette un Nick un verkiekt sik in’nanner.
Nick maakt sik doran, mit en Mischen ut veel Intuitschoon, Verstand un Glück dat komplezeerte System utenannertodröseln, dat achter de Moordreeg steken deit. Dorbi begegent he aver jümmer wedder sien fröhere Fründin, de em inst wegen sien Broder Frank verlaten hett un intwüschen mit em verheiraat is. Em hangt jümmer noch en snaakschen Scheck na, de vör lange Tiet de Grund för dat Enn vun sien Loopbahn weer. Bi sien Ünnersöken warrt he vun sien Fründ un Naver, den Maler Ed, ünnerstütt, un butendem ok vun de Börgermeesterdochter Bernadette, de mit em gau in de Kist lannt.
Een Avend passert wedder en Moord, de jüst so lett as de annern dorför. Man de Möörder begeiht dorna ditmol Sülvstmoord. För de Polizei is de Saak dormit afhaakt, man Nick un sien Helpers glöövt nich doran, vunwegen dat de Ümstännen nich in dat Bild vun den Deder passt. Op egen Fuust gaht se de Saak wieter na un finnt opletzt an’n Reekner dat Schema rut, mit dat de Klennerdaag, de Primtallen sünd, mit de Moordöörd tosamenhangt: De Hüüs sünd in de Stadt jüst so verdeelt as de Steerns vun dat Steernbild Jumfer. De Finster vun de Moordwahnungen geevt mit jemehr Stockwarken de Noten vun den Pop-Hit Calendar Girl. Alcoa is vun Nick sien Överleggen nich andoon un will em loswarrn. He lett sik aver betüdeln, dat he em maken lett, wenn he dorför den nächsten Dag Nick sien Andrag op Versetten op’n Disch hett. Opletzt hett Nick aver recht. Gemeensom mit Bernadette un Ed künnt se den Unbekannten – en Nobody, de mit de Moordreeg Acht kriegen wull – vör lopen Kamera ünnerkriegen. De Stadt is wedder seker.
Kritik ännern
film-dienst segg to den Film, dat he de Stereotypen vun dat Genre eernst nimmt, man mit de richtigen Mengde Humor vermengeleert. In de New York Times loov Vincent Canby Kevin Kline as en talenteerten Schauspeler, de vun den Speelbaas to beste Kummedie-Leistungen andreven weer[1]. Bi rec.arts.movies.reviews hett Cloyd Goodrum schreven, dat de Inholt vun den Film intressant weer. Dor keemen ne’e Sträng to de Geschicht dorto, man keen dorvun weer wieterföhrt[2].
Anners wat ännern
Bi de Dreiharbeiten to dissen Film hebbt sik Mary Elizabeth Mastrantonio un de Speelbaas Pat O’Conner in’nanner verkeken. De beiden hebbt 1990 heiraat un hebbt tosamen twee Kinner.
Borns ännern
- ↑ January Man (1989) Review/Film; Kevin Kline On the Trail Of a Killer in de New York Times vun’n 13. Januar 2009, afropen an’n 13. April 2009
- ↑ January Man (1989) op rec.arts.movies.reviews, afropen an’n 13. April 2009
Weblenken ännern
- The January Man in de Internet Movie Database (engelsch)