Wikipedia

The Professionals

Daten vun de Reeg
Plattdüütsche Titel: —
Düütsche Titel: Die Profis
Originaltitel: The Professionals
Produkschoonsland: Grootbritannien
Produkschoonsjohr(en): 1977-1983
Produzent(en):

Raymond Menmuir (44 Ep.)
Sidney Hayers (13 Ep.)
Brian Clemens (executive, 57 Ep.)
Albert Fennell (executive, 57 Ep.)
u. a.

Episodenläng: 50 Minuuten
Episodentall: 57 in 5 Staffeln
Originalspraak:

Engelsch

Musik:

Laurie Johnson

Idee:

Brian Clemens

Genre:

Krimi, Agenten

Eerst Sennen: 30. Dezember 1977
op ITV
Eerst Sennen (D): 7. Oktober 1981
op ZDF
Dorsteller

The Professionals (op plattdüütsch so veel as „De Professchonellen“; dt. Titel: Die Profis) is de Titel vun en britische Krimi- un Agenten-Actionreeg, de Enn vun de 1970er Johren na en Idee vun Brian Clemens produzeert worrn is. De Hööftrullen weern speelt vun Gordon Jackson, Lewis Collins un Martin Shaw.

Inholt

ännern

In de Actionreeg geiht dat üm de fiktiven Sünnereenheit CI5 (Criminal Intelligence 5), de noch teemlich nee is un bi’t Utföhren vun de Insätz to grote Deelen buten dat Gesett steiht. De Sinn achter disse ne’e Eenheit is, dat dat in Grootbritannien en stiegen Tall vun Gewaltverbreken geven deit, de mit disse ne’e Task-Force torüchslahn warrn schüllt. De Agenten vun de CI5 kamt dorbi ut verschedene Organisatschonen. Deels weern se in annere Afdeelen vun’n Geheemdeenst, ehmolige Soldaten oder Polizisten. De CI5-Lüüd dörloopt en bannig harde Utbilln vördem se Insätz maken drööft un jemehr physische un psychische Gesundheit warrt jümmer wedder op de Proov stellt. Hööftpersonen in de Feernsehreeg sünd, blangen den CI5-Grünner un Baas George Cowley, den sien beiden besten Lüüd, de Agenten 3-7 un 4-5. De eerste is de ehmolige Söldner William Bodie, de annere is Raymond Doyle, der vörher bi de Polizei arbeit hett.

In de enkelten Episoden Arbeit de beiden Agenten tomeist as Team tosamen. Bi jemehr Opgaven geiht dat faken üm dat Hinnern von Terroranslääg, dat Schulen vun politische Persönlichkeiten, dat Opfinnen vun Verbrekers un mitünner ok üm de Afwehr vun utlännsche Geheemagenten. Wenn de Insatz dat nödig maakt, kriegt se aver ok al mol enkelte Opgaven, so dat de Fall an’t Enn denn normalerwies dör dat Tosamenspeel vun beide Agenten lööst warrn kann. Dorbi kamt se jümmer wedder in Malessen und faken ok in hööchste Levensgefohr, wenn dat to’n Bispeel dorüm geiht in letzte Minuut en Bomb uttoschalten, oder Minschen gegen en Övermacht vun Gewaltverbrekers to schulen. An’t Enn vun jeedeen Episood hett de CI5 opletzt jümmer Spood un kriggt de Verbrekers to faten, liekers warrt de Agenten in de Reeg nich as Överminschen dorstellt, de nix passeeren kann un de keen Fehlers hebbt.

Hööftfiguren

ännern

Cowley

ännern

George Cowley, dorstellt vun Gordon Jackson, is de Baas vun’n CI5 un weer sülvst to grote Deelen an’t Grünnen vun de Sünnereenheit bedeeligt. Cowley is verantwoortlich för allns, wat den CI5 bedrapen deit, un ünnersteiht direkt den Binnenminister. Wenn dat üm de Arbeit geiht, is he jümmer vull kunnzentreert un kann sik mit sien Insichten as ‚ollen Haas‘ goot in annere Minschen rindenken. He weet jümmers nipp un nau, wat he will, un geiht keen Kompromissen in. Wenn dat nödig deit, stellt he den Spood vun de Insatz över de Gesundheit un dat Leven vun sien Lüüd aver ok vun sik sülvst. As Baas is he streng aver liekers ok gerecht.

In’n Verloop vun de Reeg, warrt verscheden Saken över de verleden Tieten bekannt: Boren weer Cowley in Schottland, wat sik ok dorin wiest, dat he en Vörleef hett för schottischen Single-Malt-Whisky. He hett en spoodrieke Loopbahn bi’t Militär achter sik un weer as Freewillig in’n Spaanschen Börgerkrieg. Bito weer he in’n Tweeten Weltkrieg un in’n Korea-Krieg. Dorna is he in’n Rang vun en Major na’n MI6 gahn un weer as Baas vun’n MI5 vörsehn, vördem he den CI5 grünnt hett.[1]

Bodie

ännern

William Andrew Philip Bodie, de bi’n CI5 de Beteken Agent 3-7 hett, warrt vun Lewis Collins speelt. He is in Liverpool boren un vun irische Afstammen. As Kind is he tohuus utneiht un hett op en Hannelsschipp anhüert. In Afrika weer he in en Scheeteree verwickelt un hett de Seefohrt denn ünnerwegens laten. An de Steed is he Söldner worrn. Sien Insichten in den Ümgang un Hannel mit Wapen wiets sik för den CI5 later mehrmols as Vördeel. Torüch in Grootbritannien weer he bi de Fallschirmjägers un later bi de Sünnereenheit SAS, vördem he na’n CI5 wesselt is.

Bodie is vun die beiden Agenten de, de in’n Insatz vör allen mit Kraasch und Insatz vun sien Lief vörgeiht. He is faken argdenkern, troet nix un nümms över’n Weg un is butendem bekannt för sien kievig Verhollen gegenöver högerstellte Personen. He överdrifft geern mol un vertellt faken ok mol ’n slechten Jux. Jüst so as sien Kolleeg fangt he faken wat mit Fronslüüd an.[2]

Doyle

ännern

Raymond Doyle, oder Agent 4-5, warrt vun Martin Shaw dorstellt. He is in junge Johren na London togen un seggt vun sik sülvst, dat he dormols en richtigen Bengel wesen is. Üm sik beter ünner Kontroll to kriegen un Disziplin to lehren hett he bi de Polizei anfungen, woneem he sik as de beste Pistolenschütt utteken de. He is denn opstegen un weer later in’t Afdeel gegen Drogenkriminalität. In en Episood vertellt he, dat he froh weer, dat he na’n CI5 wesselt is, vunwegen dat dat, wat he bi de Polizei maakt hett, nich mehr wiet weg weer vun dat, wat de Verbrekers maakt harrn. In’t echte Leven weer de Polizei Enn vun de 1970er Johren wohrhaftig dör mehrere Fäll vun Korrupschoon opfallen.

In de Reeg is Doyle mehr de vernünftige vun de beiden un nich so impulsiv as Bodie. He överleggt mehr un taxeert de Mööglichkeiten. Liekers kummt ok Doyle faken in gefährliche Situatschonen un warrt ok veel fakener besehrt as sien Kolleeg. Mitünner kummt dat ok vun sien Oort, annere Minschen to licht to glöven. Jüst so as Bodie hett Doyle faken wat mit Fronslüüd an’t Lopen, wat em ok mitünner in Malessen bringt.[3]

Produkschoon

ännern

Vörloop

ännern

De Idee to de ne’e Feernsehreeg harr Brian Clemens, de vörher al groten Andeel an de spoodrieke Krimireeg The Avengers harr. He weer dormols as Dreihbookschriever anstellt un harr vele Episoden utdacht. Na dat Enn vun de Reeg hett dat en poor Johren duert, bit de Nafolgerreeg The New Avengers op’n Weg bröcht worrn is. För dat Projekt is egens de Produkschoonsfirma Mark One Productions grünnt worrn, de to glieke Deelen Albert Fennell, Brian Clemens un den Komponist Laurie Johnson hören de, de ok al bi The Avengers tohopen arbeit harrn.

The New Avengers harr nich so veel Spood as de Originalreeg un weer na twee Staffeln wedder instellt. To de glieken Tiet harr Clemens aver al den Infall to The Professionals, de in’n Vergliek to The Avengers düütlich mehr Action hebben schüll, dorför aver ok mit düütlich weniger Szenen to’n Smustern utkamen müss. Dat Kunzept to de ne’e Reeg – de toeerst ünner den Titel The A Squad plaant weer, vördem man sik op den Titel The Professionals eenigt hett – stünn al fast, noch vördem The New Avengers afdreiht weern.

Dorstellers

ännern

För de Hööftrullen harr Clemens toeerst annere Schauspelers in’t Oog faat. So schüll de CI5-Baas Cowley egentlich vun Clive Revill speelt warrn. Man, de hett de Rull aflehnt, so dat Gordon Jackson se denn kregen hett, de bi de engelschen Tokiekers al dör tallrieke Speelfilmen un sünners ok dör sien Rull as Butler Hudson in de Feernsehreeg Upstairs Downstairs (dt.: Das Haus am Eaton Place) bekannt un geern sehn weer. För Jackson weer dat en go’e Mööglichkeit, en vullstännigen anneren Charaktertyyp dortostellen.

Ok för de beiden Agenten weern eerst annere Schauspelers vörsehn. Jon Finch schüll de Rull vun Doyle övernehmen, hett denn aver afseggt. So güng de Rull an den tweeten op de List, Martin Shaw, de blots annahmen hett, vunwegen dat he jüst keen annere Rullen bi’t Feernsehn anboden kregen harr. He hett ok jümmer wedder versöcht, ut den Verdrag ruttokamen, vunwegen dat he lever eernstere Saken spelen wull. Bodie schüll eerst vun Anthony Andrews dorstellt warrn. Man, Clemens weer na korte Tiet dorvun övertüügt, dat de beiden nich tosamenpassen deen. So is Lewis Collins ünner Verdrag nahmen worrn, de mit Shaw al tosamen in The New Avengers (in de Episood Obsession) speelt hett. Al dormols harr Clemens den Indruck, dat twüschen de beiden Schauspelers en Oort vun Spannung bestünn, de goot in dat Kunzept vun de Reeg rinpassen de. Meist as en Oort Vörutseggen ennt in de New-Avengers-Episood de Tosamenarbeit vun de beiden Filmfiguren mit den Satz: „We should work together again – good team!“ (op platt: „Wi schülln wedder tohopen arbeiten – goot Team!“). Man, to de Tiet weer de Besetten vun Doyle un Bodie noch vullkamen apen.

Utstrahlen

ännern

De Weltpremiere vun The Professionals weer an’n 30. Dezember 1977 in’t britische Feernsehn. Gau weer de Actionreeg bekannt un geern sehn, so dat se op Inschaltquoten vun bit to teihn Millionen Tokiekers kamen is. In Düütschland weer de Reeg veer Johren later övernahmen un weer to’n eersten mol an’n 7. Oktober 1981 in’t ZDF utstrahlt. Man dor weern blots 41 vun de 57 Episoden inköfft, vunwegen dat de Rest to brutal weern. In Düütschland harr de Reeg bit to 18 Millionen Tokiekers. De annern 16 Episoden hett 1991 denn de Privatsenner Sat.1 synchroniseren laten. Liekers weer een Episood (The Gun) dorbi, de eerst 1996 bi Kabel 1 to’n eersten mol wiest worrn is. Ok in Grootbritannien geev dat een Episood (The Klansmen), de nich utstrahlt worrn is. In de Episood güng dat üm dat Thema Rassismus.

Kritik

ännern

To de Feernsehreeg geev dat verschedene Ansichten. So weer to’n Bispeel de Queen andoon vun de Feernsehreeg un teken den Cowley-Dorsteller Gordon Jackson mit en Orden ut, vunwegen dat he bannig dorto bidragen harr, dat Ansehn vun de britischen Polizei to verbetern. Liekers geev dat aver ok negative Kritik. To’n een weer dat wegen de velen brutalen Actionszenen, de de Episoden teemlich realistisch maken deen. To’n annern geev dat Froonorganisatschonen üm Mary Whitehouse, de sik över de deelwies sexistischen Inholten opregen deen.

Anners wat

ännern
 
Dat Standard-Fohrtüüch vun’n CI5: De Ford Cortina
  • De Helden vun de Feernsehreeg schient jümmerto ümtogen to wesen, vunwegen dat se in’n Verloop vun de Episoden jümmer wedder in annere Wahnungen wahnt, de ok later nich wedder vörkamt. Jüst so ist dat mit dat Büro vun Cowley, dat över de Reeg ok bannig faken wesselt.
  • In de Reeg warrt, afsehn vun de eersten Staffel, meist blots Autos vun de Marke Ford bruukt. Doran is to sehn, dat Ford bi de Produkschoon mit sien Autos as Sponsor aktiv weer.
  • Jüst so as bi The Avengers gifft dat ok hier Verbinnen to de James-Bond-Reeg, vunwegen dat verschedene Dorstellers, Speelbasen un annere Lüüd bi beide Produkschoonsregen mitarbeit hebbt. To’n Bispeel hett Pierce Brosnan en lütte Nevenrull in de Episood Blood Sports. Mit de Gaasch hett he sien eersten Flaag in de USA betahlt. Un jüst so duukt hier ok verschedene Schauspelers wedder op, de al bi The Avengers in Gastrullen to sehn weern.
  • The Professionals weer een vun de eersten Feernsehregen, de op VHS-Cassette to köpen weer. In Düütschland is de Reeg 2005 op DVD rutkamen. De Episoden weern op veer DVD-Boxen opdeelt un baseert to’n Deel op de sneden düütsche Feernsehfaten.
  • Vun Oktober 1997 an weer de Nafolgerreeg CI5 – The New Professionals mit ne’e Besetten dreiht. De CI5 weer nu internatschonal ünnerwegens, harr sien Hööftsitt aver wieter in London. Dreiht weern tosamen 13 Folgen mit Edward Woodward in de Rull vun den CI5-Baas. In Düütschland weer de Reeg to’n eersten mol 1999 bi de ARD ünner den Titel Die Profis – Die nächste Generation to sehn. An den Spood vun dat Original is de Reeg nich wedder rankamen.

Episoden-Översicht[4][5]

ännern

Literatur

ännern

Borns

ännern
  1. ↑ Beschrieven vun de Figur op IMDb; afropen an’n 11. Januar 2014
  2. ↑ Beschrieven vun de Figur op IMDb; afropen an’n 11. Januar 2014
  3. ↑ Beschrieven vun de Figur op IMDb; afropen an’n 11. Januar 2014
  4. ↑ Episoden-Översicht op Fernsehserien.de, afropen an’n 9. Januar 2014
  5. ↑ Episoden-Översicht op IMDb, afropen an’n 9. Januar 2014

Weblenken

ännern
Vun „https://nds.wikipedia.org/w/index.php?title=The_Professionals&oldid=885473“