Thelarche

De Thelarche (ooltgr. vun thele för „Bostwort“; un arche för „Anfang“) betekent den Anfang vun’t Entwickeln vun de Bost bi de Deerns. Oorsaak för’t Bostentwickeln, de langsom, na un na vör sik geiht, is de Östrogen-Spegel, de anstiegen deit. De Tietpunkt vun de Thelarche liggt tomeist noch vör den Anfang vun de egentliche Pubertät. Faken is mit den Begreep aver ok nich de nipp un naue Tietpunkt meent, man de eerste Tietduer oder Schuuv vun de hele Entwicklung.

Physiologie

In Länner, de weertschoplich goot entwickelt sünd, also bi Deerns de gesund opwasst un jümmer noog to Eten hebbt, fangt de Eierstöck hüütigendaags in’t Öller vun acht bit negen Johren an langsom jümmer mehr Östrogenen in’t Blood aftogeven. Dat is verbunnen mit en Anstiegen vun de Gonadotropinkunzentratschoon in’t Blood. Dat Anstiegen vun de Geslechtshormonen lööst den Anfang vun’t Bostentwickeln ut, jüst so as dat Riepen vun de Beermudder un de Scheed. Ok dat Utbilln vun de tyypsche Liefform vun de Fronslüüd un ok dat Stüern vun’n Menstruatschoonszyklus löpt över de Östrogenen.

Op de annern Siet warrt in de Nevenneren vun de Deerns ok Androgenen produzeert, dat dat Wassdom vun’n Lief in de Hööch as ok dat Utbilln vun de Schaamhoor anregen doot (Pubarche). Se sünd later ok för’t Wassdom vun de Asselhoor verantwoortlich un mööglicherwies ok för Liefhoor an annere Steden.

Kiek ok

Literatur

E. J. Haeberle: Die Sexualität des Menschen, Walter de Gruyter, Berlin – New York 1983, ISBN 3-11-008753-7
W.D. Keidel: Kurzgefasstes Lehrbuch der Physiologie, 2. Opl, Georg Thieme Verlag, Stuttgart 1970
Werner Stangl: Körperliche und sexuelle Entwicklung im Jugendalter. (werner stangls arbeitsblätter - online)