Tommy Ingebrigtsen (* 8. August 1977 in Trondheim) is en ehmalger norweegsch Skispringer.

Karriere ännern

In’ Dezember 1993 geev he in Predazzo sien Debüt in’ Skisprung-Weltcup, un all bi sien tweet Springen an’ 17. Dezember in Courchevel kunn he mit en achten Platz all up sück upmarksom maaken.

In den folgen Winter reck he sien gröttsten Spood. An’ 1. März 1995 wurr he in dat sweedsch Gällivare eerst Juniorenweltmeester un wurr wegen dissen Spood ok in de norweegsch Mannschap för de Nordisch Skiweltmeesterschap 1995 in dat kanaadsch Thunder Bay beropen. Dor reck he överraschend un mit düütlichen Afstand de Goldmedaille up de Grootschanze; up de Normalschanze keem he up Platz 16. Nah dissen Spood wurr he in sien Heimatland mit de Stiftung-Morgenbladet-Goldmedaille ehrt.

In de folgen Johren weer Ingebrigtsen aber en bannig wankelmodig Springer. Faken schaff he dat in Wettkämpen blots en gooden Sprung hentokriegen, in’ tweeten Dörgang muss he denn aber nich selten up den Schanzenvörbau lannen. Bit 1999 kunn he in Weltcup kien Podiumsplatzeeren mehr recken.

Eerst in’ Winter 1998/99 leep dat weer wat beter. He reck fakener weer en Platz ünner de best teihn un af un to ok mal en Podiumsplatzeeren. An’ 26. Februar 2000 reck he mit Platz 2 vun de Grootschanze in Iron Mountain sien best Eenzelplatzeeren bi en Weltcupspringen.[1]

Dornah gung dat mit hüm eerst mal weer bargaf un to’n Anfang vun den Winter 2002/03 wurr Ingebrigtsen sogar blots för den Continental Cup, also de Tweete Liga vun dat Skispringen upstellt. Nahdem he sück denn en Tietlang gar nich mehr üm dat Springen kümmert hett, wunn he bi de Weltmeesterschap 2003 in Val di Fiemme de Sülvermedaille up de Normalschanze un en Bronzemedaille mit de norweegsch Mannschap; up de Grootschanze keem he up Platz 4.

In’ Weltcup reck Ingebrigtsen in sein Loopbahn een tweeten un veer darte Platzen. Charakteristisch weer sien unkonventionell un vun de Punktrichter faken mit wenig Punkten bewert Sprungstil: Bi de Anfohrtshocke nehm he de Knee meest x-förmig tosommen un in’ Floog nehm he tallriek Korrekturen mit de Arms un Hannen vör. Sien Flüüg hebbt immer wat unruhig utsehn. 2006 stell he mit 136,0 m en Schanzenrekord up den Holmenkollen up. Nah de Saison 2006/07 hett Tommy Ingebrigtsen sien Loopbahn afslooten.

Privates ännern

He is de Söhn vun den norweegschen Musiker Dag Ingebrigtsen un ok sülvst en Rock-Gitarrspeler.

Weblenken ännern

Enkeld Nahwiesen ännern

  1. Ergevnisöversicht bi www.fis-ski.com, afropen an 8. Dezember 2012.