En Trikot (frz. tricot, to: tricoter „knütten“) is en Sporthemd, dat in’n Sport tomeist in sünnere Klören utföhrt is. In’n Mannschopssport wiest dat Trikot faken en Tall (tomeist op’n Rüch) un den Naam vun den Speler. De sünnern Klören wiet dorbi denn de Tohöörigkeit to en Mannschop oder to en Sportvereen. Dat Trikot warrt bi’n Wettstriet dragen un is dorüm – sünners in’n Profisport – as en Oort Deenstkledaasch to sehn. In de meisten Fäll bargt en Trikot lange Arms.

En Ieshockey-Schiedsrichter in dat tyypsche swart-witt striepte Trikot

De Klören vun Mannschopstrikots sünd normalerwies eenheitlich. Utnahmen gifft dat aver för sünnere Speelpositschonen, as to’n Bispeel de Doorhöder vun Ballsportorden as bi’n Handball oder Football, de en sünner’t Doorhödertrikot hebbt. Bito warrt Trikots in verbreedte Spitzensportorden geern as Warfdräger bruukt (Trikotwarf). Över den egentlichen Sportbedrief rut warrt Trikot ok as Fan-Artikels in’n Sinn vun’t Merchandising verköfft. Fans teht jem denn an, üm dormit de Sympathie för en Verein to wiesen. Dat Trikot hett dormit nich blots en eenfacke Funkschpoon as Kledaasch, man is ok in verscheden Hensicht en Dräger vun Tekens.

Trikots warrt wiest nich blots de Liddmaten vun en Mannschop ut, se warrt ok in sünnere Klören för Schieds- un Lienenrichters bruukt, de dordör beter to kennen sünd. In’n Radsport warrt verscheden Klören ok insett, üm de Spitzenlüüd in de enkelten Weertungen sünners ruttostellen. So is to’n Bispeel bi de Tour de France dat Gele Trikot en Teken för de beste Samtleistung, wiel dat Gröne Trikot den besten Sprinter utwiest. Dat Witte Trikot stellt den besten Nawassfohrern (U25) rut, wiel dat Trikot mit Punkten för den besten Bargfohrer is.

Historie ännern

De eersten Sporttrikots sünd to Anfang vun’t 19. Johrhunnert opkamen. Mit de Turnbewegung vun „Turnvadder“ Jahn hett sik af 1807 dat Turnen as Bredensport dörsett. Dorut hebbt sik denn ok de eersten Sportverenen billt, verbunnen mit dat Anliggen, dat de Spelers vun ünnerscheedliche Mannschoppen optisch beter ut’nanner to hollen weern. De Hemden vun de Mannschopsliddmaten weern ut den Grund in de Klören vun’n Vereen infarvt un ok mit Vereensafteken un -logos utstaffeert. Dör de Tallen, de op’n Rüch opneiht weern, künn een ok de enkelten Sportlers ut’nannerholen. En wieteren Grund to’n Entwickeln vun sünnere Sportkledaasch weern de eersten Olympschen Spelen vun de Neetiet, de 1896 utdragen weern[1].

Mit de 1970er Johren füng dat denn – toeerst in’n Football – an, dat de Trikot ok för Warf vun de Sponsors nütt weern. In de Bundsligasaison 1973/74 wull de Vereen Eintracht Bruunswiek dormit de Verlusten utglieken, de dat geven hett, nadem de Tokiekers wegbleven. Al in de Bundsligasaison dat annere Johr hett sik Warf dörsett. Vundaag finnt sik Warflogos op de Trikots vun meist all Profisportlers [2].

Bit Anfang vun de 1970er Johren weern Trikot normalerwies ut Boomwull maakt, weer denn aver gröttstendeels aflöst vun Polyamid. Vundaag warrt hoochweertige Trikots tomeist in Form vun Mikrofesen ut Polyester herstellt.

Trikots hebbt intwüschen ok Ingang funnen in de Mood. Vör allen trendige Second-Hand-Ladens beedt Originalworen ut verschede Spoortorden an. Enige Trikots warrt ok vun Anfang an as Moodartikels produzeert un sünd gor nich eerst dorför vörsehn, dat se in’n Sport dragen warrt. Opschriften un Rüchtallen deent dorbi vör allen as Dekoratschoon oder as Teken för den Markennaam.

Weblenken ännern

Borns ännern

  1. Sportnews Hameln: Sportbekleidung – die Geschichte des Trikots. Afropen an’n 12. September 2012
  2. Bayern 2: Die Geschichte des Fußball-Sponsorings. Afropen an’n 12. September 2012.

Kiek ok ännern