Gymnasium Ulricianum

Dat Gymnasium Ulricianum is en algemeenbildend Gymnasium in Auerk, Oostfreesland. Dat Gymnasium hett upstünds (2020) rund 1.800 Schölers un is daarmit dat grootste Gymnasium van Nedersassen. Naamgever van de 1646 gründt School is Ulrich II. (1606–1648), de van 1628 an Graaf van Oostfreesland weer.

Gebüüd 2012

Histoorje/Vandaag

Gründt wurr dat Gymnasium Ulricianum 1646 van Graaf Ulrich II. De 350-Jahr-Fier funn 1996 statt. 2008 fierde man mit en groot Festumtog dör de Binnenstadt van Auerk un mit en mehr as hunnert Meters langen Festgirlande um de heel Bau umto dat eenhunnertjahrige Jubiläum van de Oldbau as ok dat Utgeven van de Literatuurnobelpries an de bekennde Ulricianer, Rudolf Eucken. De Festvördrag över Eucken wurr van de Philosoph Hermann Lübbe, de sülven maal Ulricianer west is, hollen. Siet dat Schooljahr 2004/2005 word dör en Schoolreform in Nedersassen ok de 5. un 6. Jahrgang an d' Gymnasium unnerricht. Intüsken (2016) besöken 1830 Schölers van de Jahrgangen 5 bit 12 de School, de van rund 160 Pädagogen (Referendaren inbegrepen) unnerricht worden. Siet dat Schooljahr 2015/2016 is de Butenstee in 't Schoolzentrum Moorhusen uplösst. In de allerbest Tieden, as dat noch 13. Jahrgangen gaff, hebben över 2000 Schölers de School besöcht. Dat Ulricianum is Utbildschool för de Studiumsseminaren Leer un Wilhelmshaven.

Schooldrager

Wieldes de twalven Grundscholen, de Haupt- un de Realschool in Auerk döör de Stadt dragen worden, is för dat Gymnasium Ulricianum de Landkreis Schooldrager. Nettso befinnen sük de Integreert Gesamtschool (IGS) Auerk-West (bit Jahrgang 13) un de IGS Waldschool Egels (bit ingerekent Jahrgang teihn) in de Dragerskupp van de Landkreis Auerk.

Profil van de School

Unnerrichtsswaarpunkten

De School hett en groot Fackenangebood, ok in de Kursstuuf un in de Leistungskursen. In de Middelstuuf gifft dat van Klass 7 an en bilinguaal Angebood. Butendeem gifft dat sied dat Schooljahr 2001/2002 Blaserklassen, in de Musikunnericht praktisch as ok theoretisch anboden word. Dat Gymnasium weer, as de grootste School van Nedersassen, Lidd van de landeswied "Modellversuch zur Qualitätsentwicklung".

Wetenskuppsdagen

Elk Jahr in Harfst is dat Gymnasium Mitutrichter van de Auerker Wetenskuppsdagen. In disse Weken worden benöömte Wetenskuppers, daarunner al mehr as en Dutz Nobelpriesdragers, to Vördragen in de Kamers van de School of van de Sponsoren nöögt. Schölers ut de hogere Klassen komen so in d' Geneet van Stipendien an Unnersööksinstituten in heel Düütskland un Europa of könen an Unnersööksprojekten in de heel Welt deelnehmen, daarunner Expeditionen in de Antarktis un na Jakutien. Siet 2001 sallen över de "Juniorwetenskuppsdagen" ok jungere Schölers in Tosamenarbeid mit Wetenskuppers van mehren düütsken Unnersööksinrichten an natuurwetenskuppelk Fragen un Experimenteren heranbrocht worden.

Talen (Spraken)

Van Klass 5 an is Engelsk 1. Frömdtaal. As 2. Frömdtaal worden van Klass 6 an Latien, Spaansk of Fransk anboden. Van Klass 7 an (2. Halvjahr) is en darde Frömdtaal mögelk: Latien, Greeksk, Fransk un Spaansk. Butendeem is van Klass 10 an Spaansk mögelk, bi genoog Nafraag worden ok Latien un Fransk anboden. In de AG-Beriek worden, ofhangend daarvan, wovööl Schölers sük melden, Italiensk, Japaansk un Oostfreesk Platt anboden. För de Jahrgangen 6 un 7 gifft dat en Latien-Lehrspölen-AG. Ok gifft dat van Klass 7 an en bilinguaal Angebood in de Facken Eerdkund, Geschicht und Politik. Siet 2003 is dat Ulricianum tweemaal in 't Jahr (Vörjahr un Harvst) tostännig för de bidoonde Prüfungen Latien (groot Latinum, Latinum, lüttjet Latinum) un, wenn 't brukt word (lest Maal in d' Harvst 2011), ok för Hebrääsk. De Tostännigheid gellt för de heel noordelk Weser-Ems-Beriek (Ollenburg insloten).

Projekten

De School is Deel van dat Cornelius-Programm, dat de Partnerskupp mit mehren Scholen fördern deit.

Internationaal Gymnasium

In d' heel Wereld hett dat Gymnasium mennig Partnerskuppen. To nömen sünd hier besünners de Partnerskuppen, de mit en intensiv Schöleruttuusk lebennig hollen worden, as t. B. to de Guajome Park Academy in Vista/Kalifornien as ok to de Westhills High School as Deel van dat GAPP-Programm, to de Lycée in Luneville (Frankriek) un to de Liceum Ogolnoksztalcaçe in Kepno/Polen. Anner Partnerscholen sünd:

• Walther-Rathenau-Gymnasium Bitterfeld
• Vollen Ungsdomsskole – Asker/Norwegen
• XIII. Liceum – Wrocław/Polen
• Gimnazium Pribram/Tschechien
• Liceo Scientifico Orazio Grassi, Savona/Italien
• Leeuwarden/Nederland
• Torre del Mar/Spaanien

Literatuur

• Programm des Königlichen Gymnasiums zu Aurich. Tapper, Auerk 1861–1892 (Digitalisat)
• Ulricianum in Aurich 1646 - 1955. Friedrich van Senden, 1967
• Festschrift 350 Jahre Ulricianum – Gymnasium Ulricianum Aurich 1646-1996. Hans-Jürgen Westermayer, 1996

Weblinks

• Websied van dat Gymnasium (hoochdüütsch)

Enkelt Nawiesen

---

Disse Artikel is op Oostfreesch schreven. Mehr Artikels op Oostfreesch.

---