Ulysses (Kansas)

Ulysses is ene Stadt in Kansas in den USA. Se is de Seet vun de Verwalten vun den Grant County un harr in’t Johr 2000 5960 Inwahners op en Rebeet vun 7,5 Quadratkilometer. Ulysses liggt an den Stroom Cimarron.

Dör den Oort löppt de Highway 160 un de Bahnlien vun de BNSF Railway. In de Merr vun dat 19. Johrhunnert löpp mit den Santa Fe Trail en wichtigen Hannelsweg dör den Oort.

Historie

1873 hett de Atchison, Topeka and Santa Fe Railway ehr Bahnstreek vun Topeka na Santa Fe boot. An de ne’e Bahnstreek hebbt sik gau vele lütte Städer grünnt. Dorto höör ok dat na US-Präsident Ulysses S. Grant nöömte Ulysses. 1885 hett George W. Earp den Oort vermeten, wat as Tiet vun de Grünnung vun Ulysses gellt.Vullen ofiiziellen Status kreeg de Oort in’n Juni 1888. De Oort harr to de Tiet üm un bi 2000 Inwahners un twölf Restorongs, veer Hotels, söss Speelhallen un en Reeg annere Bedrieven. In dat sülve Johr hett sik de Oort enen Wettstriet mit Appomottox levert, ’keen de Sitt vun’n Grant County wesen schull. Ulysses hett wunnen, aver müss sik dorför in Schullen störten. 1909 kunn de Oort siene Plichten nich mehr betahlen un de Banken wullen all dat Land un de Bowarken, de de Stadt tohören, veraukschoneren.

Dat Hotel Edwards na dat Verschuven

De Inwahners hebbt nu all ehr Hüüs op Sledens sett un fief Kilometer wieder wedder afsett un sünd mit de ganze Stadt ümtrocken. Blots dat Schoolhuus ut Steen hebbt se an’n olen Platz stahn laten. De ne’e Stadt hebbt se New Ulysses dööpt. Dat Land vun de ole Stadt füll an de Banken. Dat Hotel Edwards, dat se in dree Delen na den ne’en Platz bröcht harrn, is dat eenzige Huus, dat ut disse Tiet nableven is. Dat Hotel is hüüt dat Museum vun’n Grant County.

1920 hebbt se in de Region Eerdgas funnen. An’n 10. Januar 1921 hett sik New Ulysses denn wedder den ne’en olen Naam Ulysses geven.

Weblenken

• Websteed vun de Stadt (engelsch)
• www.legendsofamerica.com − Ulysses warrt verschaven (engelsch)