Vincenzo Nibali

Vincenzo Nibali (* 14. November 1984 in Messina) is en ehmalger italieensch Radrennfohrer.

Nahdem he all in sien Jöögdtiet bi Rad-Weltmeesterschapen Medaillen winnen kunn, kreeg he 2005 sien eersten Profi-Verdrag bi dat Team Fassa Bortolo. Ok dor weer he all temelk spoodriek. Siet 2006 fohrt he denn för den Liquigas Rennstall. Bi de Settimana Internazionale kunn he denn all een Deelstreck winnen. Bi de Eneco Tour keem he in de Gesamtwertung up den 3. Platz. Sien bit dorhen gröttste Spood weer denn aber de Sieg bi dat Rennen GP Ouest France.

2008 nehm he an de Olympisch Sömmerspelen deel.

Bi den Giro d’Italia 2010 wunn he mit sien Team dat Mannschapstietfohren un kunn dree Daag lang dat Maglia Rosa dragen. Dorto wunn he de 14. Deelstreck un keem in de Gesamtwertung up den 3. Platz. Enn’ September 2010 wunn he denn de Vuelta a España, ok wenn he nich een Deelstreck wunnen harr. 2011 hett he kien Rennen wunnen, keem aber bi den Giro d’Italia in de Gesamtwerung up den tweeten Platz.

2012 wunn he aber een Deelstreck un de Gesamtwertung bi de Fröhjohrs-Rundfohrt Tirreno-Adriatico. Ok bi de Tour of Oman wunn he een Deelstreck. Bi de Tour de France in dat sülvig Johr keem he in de Gesamtwertung up den darten Platz. Ok an de Olympisch Sömmerspelen hett he deelnommen.

Enn’ 2012 is he to dat kasachisch Team Astana Pro Team wesselt un hett dor den bitherigen Kapitän un Olympiasieger Alexander Nikolajewitsch Winokurow ersett, de sien Loopbahn afslooten harr. För sien nee Rennstall kunn he 2013 glieks sien Titel bi Tirreno-Adriatico verteidigen, bleev dorbi aber ahn Sieg in Deelstrecken. Bi den Giro del Trentino wunn he en Deelstreck, de Bargwertung und dat Rennen an sück. Dornah gelung hüm de Sieg bi den Giro, wo he todem en Deelstreck un dat Bargtietfohren wunn.

Sien gröttste Spood weer 2014 de Gesamtsieg bi de Tour de France. 2022 is he torüchtreeden.