Vita Willehadi
De Vita Willehadi is en Biografie von Willehad, den eersten Bischop von Bremen, de üm un bi dat Johr 850 schreven worrn is.
As Terminus post quem, as Tied, vör de de Biografie nich schreven worrn wesen kann, lett sik dat Johr 838 fastsetten, in dat Willehad sien Nafolger Willerik doodbleven is, denn de Vita snackt von bonae memoriae Willericus.
Adam von Bremen vertellt uns in sien Gesta Hammaburgensis ecclesiae pontificium (üm un bi 1075), dat Bischop Ansgar de Vita schreven hebben schall, wat aver wohrschienlich nich stimmt. Gerlinde Niemeyer[1] geiht dor von ut, dat de Schriever von de Vita in dat Klooster Echternach leevt hebben mutt.
Von de Vita sünd man dree Handschriften nableven, wat allens Afschriften ut dat 11. Johrhunnert sünd.