Wat Recht is, mutt Recht blieben
Wat Recht is, mutt Recht blieben is de 136. Feernsehfilm ut de Reeg Tatort, de bi de ARD löppt. Produzeert hett em de NDR. De Film is in’n September un Oktober 1981 in de Ümgegend von Cuxhoben (Haven von Olenbrook un Gasthuus Zur Schleuse, Cuxhoben un Neehuus) dreiht worrn un an’n 2. Mai 1982 toeerst in de ARD lopen. De Film is bekannt as de eenzigste Deel von de ans meist hoochdüütsche Reeg in de in Delen blot Plattdüütsch snackt worrn is (mit Ünnertitels för de hoochdüütschen Tokiekers). De Film harr bi’t eerste Utstrahlen en Inschaltquoot von 14,39 Millionen, wat en Andeel von 41 % weer.
| Filmdaten | |
|---|---|
| Originaltitel: | Wat Recht is, mutt Recht blieben |
| Produkschoonsland: | Düütschland |
| Johr vun’t Rutkamen: | 1982 |
| Läng: | 77:57 Minuten |
| Originalspraak: | Hoochdüütsch/Plattdüütsch |
| Filmkru | |
| Speelbaas: | Volker Vogeler |
| Dreihbook: | Elke Loewe |
| Produkschoon: | Jürgen Böttcher |
| Kamera: | Günther Wulff |
| Snitt: | Birgit Levin |
| Dorstellers | |
| |
De Vörlaag keem von Boy Lornsen, ut de Elke Loewe denn dat Dreihbook maakt hett. Speelbaas weer Volker Vogeler.
De Geschicht speelt in’t Dörp Kathariensiel in Dithmarschen an de Waterkant. Op en Boot in’n Haben warrt een Morgen en Doden funnen, en Hambörger op sien Wekenenn-Segler. Kommissar Nikolaus Schnoor schall den Fall opklären. De veer olen Schippers Peter Burmeester, Rufus Beller, Jakob Mühlensiepen un Johannes Hansen sitt Dag för Dag op jemehr Bank an’n Haven un weet villicht mehr. Aver so recht is ut jem nix ruttokriegen.