Waterslott Mellenthin

Dat Waterslott Mellenthin is en Herrenhuus in Mellenthin up dat Eiland Usedom in’n Landkreis Vörpommern-Griepswohld in Mekelnborg-Vörpommern.

Waterslott Mellenthin

Waterslott Mellenthin, Rückansicht

Historie

Mellenthin weer neben Gothen, nahwiesbar siet dat 14. Johrhunnert, en Stammgoot van de adlige Neuenkirchen. Dat Slott Mellenthin wurr tüschen 1575 un 1580 in’n Updrag van Rüdiger von Nienkerken (Neuenkirchen) baut, en Raat van den Hartog Ernst Ludwig van Pommern-Wolgast. Baumeester weer angevlich Antonio Wilhelmi. De Överrest van en Vörgängerbau befinnd sück afsiets dorvan in den Gootspark.

Nah dat Utstarven van de Familie von Neuenkirchen 1641 un dat Enn’n van den Dartigjohrigen Krieg wurr Johan Axelsson Oxenstierna dör de sweedsch Königin Christina mit dat nu in Sweedsch-Pommern liggend Goot beleht. Wenige Johren later keem Mellenthin in den Besitt van den General Burchard Müller von der Lühne. De sien Nahkommen hemm dat Goot bit 1747 in’n Besitt harrt. Denn wurr dat allodifizeert un bi en apenlich Verstiegern dör den preußischen Kriegsraat Bleichert Peter von Meyenn köfft. Nah en Konkurs keem dat Goot Mellenthin 1818 an den Swienemünner Justizraat Wittchow, de sien Familie bit 1910 in den Besitt van dat Goot bleev.

1931 hett de Makler Wenner dat Watersloot un 120 Hektar Land köfft. Dat restliche Gootsland wurr upsiedelt. De Gootsbesitter wurr nah dat Enn’n van den Tweeten Weltkrieg enteignet. Dat Bauwark wurr dör de Gemeend bruukt, de hier ünner annern Wahnungen, en Kinnergorden un en Heimatmuseum inrichten dee. To DDR-Tieden keem ok en Weertshuus in dat Slott. Nah de Weddervereenigen wurr dat Waterslott 2001 privatiseert un to en Hotel mit Gastronomie utbaut. Siet Oktober 2011 wurrd in den rechten Flögel en Gasthuusbrooeree bedreeven. In de ehmaige Slottkapelle befinnd sück en Laden mit Koffierösteree.

Anlaag

Slott Mellenthin in dat 19. Johrhunnert

Dat Bauwark befinnd sück up den süüdwestlichen Deel van en künstlich Eiland van rund 100 m Längt un 80 m Breedt, de van en etwa 20 m breet Watergraben umgeeven is. De Grabensieden sünd dör Futtermüern sekert.

Dat Hööfthuus van de dreeflögelig Anlaag is en tweegeschossig, söebenassig putzt Backsteenbau mit Krüppelwalmdaak. Up de Hoffsiet hett dat Bauwark en breeden eenassigen Middelrisaliten un twee schmalere Siedenrisalite mit Walmdaak. Dat umloopend Traufgesims is in de dreegeschossig Risaliten as geschosstrennend Gesims wiederführt. De Eckquaderung van den Putz stammt van en Renoveeren van dat Huus an dat Enn’n van dat 19. Johrhunnert.

Tüschen den Middelrisaliten un den rechten Siedenrisaliten befinnd sück en apen Ingangsvörbau mit Rundbagen un Krüüzgratgewölbe, de 1904 upricht wurr. Dor befinnd sück en Tafel mit en Inschrift un dat Familienwappen, de Christoph von Neuenkirchen hier 1596 to Erinnerung an sien Vader, den Bauherrn van dat Slott, anbringen leet.

Up de Gordensiet befinnd sück en tweeassig Middelrisalit, vör den 1904 en Freetrapp anleggt un to dat Enn’n van dat 20. Johrhunnert weer wegnommen wurr. An den östlichen Geevel befinnd sück en Trappenhuusvörbau.

In dat Binnere sünd Keller, Eerd- un Bövergeschoss as Krüüzgratgewölbe (Stichkappentonnen) utführt. In de Ingangshall wurrd dat Gewölbe van en toskaansch Säule dragen. Dor befinnd sück ok en Renaissancekamin ut dat Johr 1613, de orsprünglich in den Saal in dat Bövergeschoss stunn.

Saal

Anbau för Brooeree un Terrasse

An de Hoffsiet befinnen sück twee Siedenflögel, de dat Hööftbauwark mit hör Ecken anticken, aber kien binnere Verbinnen dorto upwiesen. De rechte, südwestliche Siedenflögel geiht wohrschienlich up en befestigten Vörgängerbau mit je een Toorn an de ööstlich un südlich Eck torüch. De harr oorsprünglich, as dat Hööftbauwark, in all Deelen Stichkappentünnen un wurr dorher wohrschienlich to glieker Tiet upricht. In dissen Flögel befinnen sück twee groot saalartige Rüüm. De weern dör Tüschenwanden iun Inbauten lüttger maakt wurrn, wurrn aber bi de Restaurerensarbeiten in de 2000er Johren wieer wietgahnd free leggt. Wiederhen befunnen sück in den Siedenflögel Wahnrüüm för Gäste un Deenstpersonal as ok en Kapelle. För de 2011 apen maakt Gasthuusbrooeree kreeg dat Bauwark en Anbau ut Glas, in de sück de Produktschons- un Lagerrüüm van de Brooeree as ok en Terrasse för de Gäste befinnen.

De linke Siedenflögel wurr in dat 17. Johrhunnert upricht. Dorin weer oorsprünglich de Marstall, hüüd is dor en Hotel.

Up beid Sieden van de to dat Waterslott führend Alleen befinnen sück de fröheren Wertschapsbauwarken van de Gootsanlaag.

Kiek ok

• Slott Stolpe un Slott Pudagla, twee anner Slottbauten up dat Eiland Usedom

Literatur

• Dirk Schleinert: Die Geschichte der Insel Usedom. Hinstorff Verlag, Rostock 2005, ISBN 3-356-01081-6.
• Neidhardt Krauß, Egon Fischer: Unterwegs zu Burgen, Schlössern und Parkanlagen in Vorpommern. Hinstorff Verlag Rostock 1991, ISBN 3-356-00391-7, S. 36.
• Landesamt für Denkmalpflege Mecklenburg-Vorpommern (Hrsg.): Die Bau- und Kunstdenkmale in Mecklenburg-Vorpommern. Vorpommersche Küstenregion. Henschel Verlag, Berlin 1995, ISBN 3-89487-222-5, S. 336–337.
• Hugo Lemcke: Der Kreis Usedom-Wollin. (= Die Bau- und Kunstdenkmäler des Regierungsbezirkes Stettin. Heft IV), Saunier, Stettin 1900, S. 374–379.
• Material to dat Slott Mellenthin in de Sammlung Duncker van de Zentral- und Landesbibliothek Berlin (PDF; 239 kB)

Weblinks

Waterslott Mellenthin. Mehr Biller, Videos oder Audiodateien to’t Thema gifft dat bi Wikimedia Commons.

• 3D-Modell Waterslott Mellenthin