Wehbers Möhl
Wehbers Möhl is en Wind- un Watermöhl an’n Hosterbeek in Himmelpoorten.
De ole Watermöhl an’n Hosterbeek hett to’n Besitt von dat Klooster Himmelpoorten höört. Na dat Enn von Dörtigjohrigen Krieg un de Säkularisation hett 1653 de Kloostervaagt Michael Wehber de Watermöhl as Lehn kregen. De Möhl leeg bet 1739 dichter an de Bundsstraat un is denn an de hüdige Steed nee boot worrn. 1871 hett de ole Watermöhl nich mehr noog Kraft opbröcht un se hebbt denn en Galeriehollanner mit veer Stockwarken ünner de Galerie boot. De Möhl harr dree Schrootgäng, een Mahlgang un een Spitzgang. Denn harr de Möhl noch en Sichtmaschien.
1907 hett de Windmöhl en Dampmaschien kregen. 1937 hett se bi en Storm en sworen Schaden afkregen, sietdem harrn de Flögels un de Galerie fehlt. Dat Staurecht för de Watermöhl is 1958 ophaven worrn. 1971 hebbt se denn de Mölleree ganz instellt un de Möhl is blots noch as Lager bruukt worrn. 1985/1986 is de Möhl denn kumplett restaureert worrn un hett ok wedder Flögels un Galerie kregen. Wehbers Möhl steiht vondaag ünner Denkmaalschutz. Dor is nu siet 1972 en Heimwarker- un Goornmarkt in[1], de noch jümmer von de Familie Wehber (12. un 13. Generatschoon) bedreven warrt. In de Windmöhl is 2001 en Restaurant inricht worrn.
För de Tokumst is dat plaant, de 2000 m² groten Gebüüd von’n Heimwarker- un Goornmarkt aftorieten un dor en 4000 m² groot neet Gebüüd to boon.[1]
Footnoten
ännern- ↑ a b Peter von Allwörden: Neubau-Pläne: So soll Wehbers Mühle erweitert werden, Stader Tageblatt an’n 24. Januar 2020
Weblenken
ännern
- Websteed von de Möhl (hoochdüütsch)
Koordinaten:53° 37′ N, 9° 18′ O