Weltreligion

De Weltreligionen sünd de wichtigsten Religionen, de dat op de Welt gifft. Blots is dat nich so ganz licht, fasttoleggen, welke Religionen dorto höört. Jedeen Religion denkt ja vun sik, dat se wichtiger is, as all de annern. Un dat gifft ok mehr as een System, so en List tosamentostellen. Swor is dorbi ok noch, dat nich alle Gruppen dormit tofreden sünd, woans se klassifizeert warrt: sünd t.B. de Mormonen en Deel vun't Christendom oder sünd se sülvst en egen Religion? Oder sogor en egen Weltreligion?

Wieldat sik de Lüüd över de Kriterien nich eenig sünd, gifft dat ok ünnerscheedliche Listen vun Weltreligionen.

De wichtigsten Kriterien sünd:

de Religion hett en grote Tall vun Liddmaten
de Religion finnt sik in groten Delen vun de Welt.
de Religion hett’n missionaarschen Ansprook un jedeen, de will, kann ok Liddmaat warrn.

Weltreligionen

Disse fief Religionen warrt tomehrst as Weltreligion ansehn (na Öller sorteert)

Jödendom (ca. 15 Mio. Liddmaten)
Hinduismus (ca. 850 Mio. Liddmaten)
Buddhismus (ca. 375 Mio. Liddmaten)
Christendom (ca. 2,1 Mrd. Liddmaten)
Islam (ca. 1,3 Mrd. Liddmaten)

Dat Christendom un de Islam missioneert aktiv, de Buddhismus, de Hinduismus un dat Jödendom maakt dat nich. Juud oder Hindu warrt een tomehrst dör de Geboort. Dat Jödendom hett nich so vele Liddmaten, dat steiht aber doch in disse List, wieldat dat Jödendom en Wörtel vun Christendom un Islam weer. Dat is mööglich, to dat Jödendom övertotreden, aber dat gifft keen aktive jüüdsche Mission.

En minimalitsche Sicht vun Weltreligion is, dat blots de Buddhismus, dat Christendom un de Islam Weltreligionen sünd. Se harrn al bi ehr Grünnen den Ansprook, en universelle Religion to ween, se gifft dat weltwiet, de Tall vun Anhängers is groot un de Religion is all oolt.