Weltvagelpark Wasra

De Weltvagelpark Wasra is een vun de gröttsten Vagelparks vun de helen Welt. He liggt midden in de Lümborger Heid op dat Rebeet vun de Gemeen Bomlitz bi Wasra in Neddersassen. Dat Land vun’n Park ümfaat 240.000 m², un dorop leevt ruchweg 4.200 Vagels ut 675 Oorden ut all Eerddeelen un ut jede Klimazoon vun de Welt.

Statue an’n Ingang

Anlagen

Parkanlaag mit tyypsche Volieren un en vun de Restaurants in’n Achtergrund

De Vagelpark bargt en grote Tall vun Binnen- un Butenvolieren un Freehagens. Butendem kann de Besöker in en Freeflaaghall mit anslaten Dünenlandschop un Bülgenanlaag un in mehrere annere Hüüs (t. B. Tropenwooldhuus) Vagels in jemehr namaakt natürlich Ümfeld beobachten ahn dör Gidders scheedt to wesen. In de ne’eren Rebeden vun’n Park warrt vör allen de natürliche Ümwelt vun de Vagels nastellt, wiel de ölleren Anlagen vör allen ut groot anleggte Park- un Wooldlandschoppen besteiht, ünner annern mit grote Rosen- un Rhododendronbetten.

En Sünnerheit sünd de Flaagvörföhren op en Freelichtbühn. Hier warrt nich blots de Flagen vun Falken un Aadlers as in annere Flaagvörföhren wiest, man ünner annern ok vun Papageien, Pelikanen un Loopaanten. För Kinner is de Park ok teemlich intressant dör verschedene Vörföhren vun’t Fodern un dör en Vagelbaby-Optuchtstatschoon, de vun buten insehn warrn kann.

De Buckwindmöhl in’n Vagelpark is een Statschoon vun de Neddersass’schen Möhlenstraat.

Tuchtprogrammen

De Weltvagelpark Wasra is internatschonal hooch acht, vun wegen dat he en Reeg vun Vagels hollt, de dat in keen annern Zoo op de Welt to sehn gifft un ok vun wegen dat hier en Tall vun Eersttuchten henkregen worrn sünd. De Vagelpark bedeeligt sik an’t Europääsche Bewohrtuchtprogramm un hett ünner annern ok Uhus to’n Wedderansiedeln praat stellt. Bito is de Park an’t Tuchtprogramm vun de Bernieraant un vele annere Vageloorden bedeeligt, de för’t Utstarven staht.

Historie vun’n Vagelpark

Grünnt weer de Park 1962 vun den Wasraer Koopmann Fritz Geschke as’n private Tucht vun Fasanen un Watervagels. He hett den Park 1964 an sien Swiegersöhn Wolf W. Brehm övergeven, den den Park un sünners sien Rasenflachen gau utboet hett. 1968 is de Paradies-Hall mit en Flach vun 2.100 m² apen maakt worrn. Dorna sünd Bowarken dortokamen, de de Richt vun’n Park bestimmen deen, as de Freeflaaghall, en Pinguinanlaag un vele mehr.

In’n Rahmen vun de Expo 2000 in Hannober is de Tropenwooldhall mit indonesische Artefakten un asiatische Vageloorden apen maakt worrn- Dorna kemen noch de Uhu-Borg un dat Boomhuusdörp dorto. In’n Vagelpark geev dat butendem ok noch dat Düütsche Vagelkaven-Museum, dat aver 2006 oplöst un bi Sotheby’s veraukschoneert worrn is.

Wegen gewarfliche Mucken vun de fröheren Bedrievers is de Park in’t Johr 2000 vun ne’e Bedrievers övernahmen worrn. Wiel in de fröheren Johren vun Vörföhren tomeist afsehn worrn is, sünd nu na un na Flaagvörföhren usw. inföhrt worrn, wat dat Intresse vun de Besökers anstiegen laten hett. De Bestand vun den Park künn dormit seker stellt warrn. Man, de Besökertallen güngen in’t Johr 2008 op 280.000 rünner, wat för den weertschopplichen Bedrief to wenig is. De drauhen Insolvenz künn in’n März 2009 dör dat Instiegen vun dat belgische Ünnernehmen Floralux afwennt warrn.

Anners wat

In de Neeg vun’n Vagelpark liggt en Bahnhoff vun de Bahnstreck Bomlitz–Wasra, op de Nostalgie-Fohrten maakt warrt.

Bildergalerie

• 
  Na de Flaagvörföhren
• 
  Flaagvörföhren mit Ara
• 
  Twee Resentukanen, de Maskottchen vun’n Vagelpark
• 
  In de Tropenwooldhall

Literatur

• Weltvogelpark Walsrode Parkguide, Rgv.: Vogelpark Walsrode GmbH, 36. Opl., 2012, 212 S.
• Botanik im Weltvogelpark Walsrode - eine Entdeckungsreise in die Welt der Pflanzen, Katrin & Alexander Laatsch, BooksOnDemand, 2012, 52 S., ISBN 978-3-8448-1905-2 Online Version: Neuer Botanik-Führer: Eine Entdeckungsreise in die Welt der Pflanzen
• Wir entdecken die Vögel (Wieso? Weshalb? Warum?), Patricia Mennen (Text) & Anne Ebert (Biller), Ravensburger Buchverlag, ISBN 978-3-473-32831-4
• Wir entdecken die Vögel (Wieso? Weshalb? Warum?) [Audiobook] (Audio CD), Jumbo Neue Medien & Verlag GmbH, ISBN 978-3-8337-2620-0
• Vogelpark Walsrode - viel mehr als Vögel, Rgv.: Vagelpark Wasra GmbH, o.O. o.J. (31. Opl.), 162 S. m. vele Biller

Weblenken

Weltvagelpark Wasra. Mehr Biller, Videos oder Audiodateien to’t Thema gifft dat bi Wikimedia Commons.

• Websteed vun’n Weltvagelpark Wasra (hoochdüütsch)
• Biller ut’n Weltvagelpark Wasra (hoochdüütsch)