Bernier siene Aant

Bernier siene Aant (Anas bernieri) is en Aart ut de Familie vun de Aantenvagels. Se höört hüdigendags to de roorsten Watervagels vun'e Welt un is in grote Gefohr. Vunwegen de lange Isolatschoon up Madagaskar hett sik de Aart wohrschienlich ut Formen vun de Wittkehlaanten entwickelt. Se is 1850 funnen un 1860 to'n eersten mol wetenschopplich beschreven wurrn. As Bruggenaart to Bernier siene Aante warrt de Andamanenaante ankeken, wo se bannig na sleiht.

Bernier siene Aant
Waart vun Bernier siene Aant
Systematik
Ünnerstamm: Warveldeerten (Vertebrata) Klass: Vagels (Aves) Ornen: Gösevagels (Anseriformes) Familie: Aantenvagels (Anatidae) Ünnerfamilie: Echte Aanten (Anatinae) Tribus: Swemmaanten Geslecht: Aanten an sik Oort: Bernier siene Aant
Wetenschoplich Naam
Anas bernieri
(Hartlaub, 1860)

Satellitenfoto vun Madagaskar - Bernier siene Aanten leevt vundagen bloß noch an een See an Madagaskar siene Westküst

Seken vun de Bernier siene Aant

Utsehn

De Waarten un de Aanten verscheelt sik bi Bernier siene Aant nich groot. De Farv vun de Feddern geiht vun ocker bit roodbruun. Bi den Waart geiht de Farv vun den Snavel un vun de Föte un vun'n Snavel en beten na rood hen, bi de Wiefken sünd se bruun. De Lütten dreegt boven swattbrune Dunen, an'n Buuk sünd se goldgeel. Snavel un Been sünd bi de Küken swattbruun.

Wo se leven doot un wie veel Aanten dat dor gifft

An un for sik weer Bernier siene Aant in den westlichen Deel vun Madagaskar tohuse. As se toeerst funnen wurrn is, weer se in Brookland un langs de Ströme in lüttje Gruppen togange. Hüdigendags leevt se in Freeheit man bloß noch an den Bemambasee, nich wiet af vun de Waterkant an de Westküst. De See warrt hüdigendags intensiv bruukt to'n Anboo vun Ries; bloß man en Deelstück vun den See is noch in natüürlichen Tostand. Bovento is 1950 en sunnerlichen Fisch in den See utsett wurrn, de bannig veel vun de Waterplanten upfreten deit. De Buern brennt todem, vunwegen de Landweertschop, regelmotog dat Bentgras un de Rüschen af, wo de Aanten in bröden doot. Tolest is se up Madagaskar ok nich schuult un warrt vundeswegen schaten. De Gesamtbestand is 1993 up bloß man noch 500 Vagels taxeert wurrn.

Brödeltied un Eier

Over Bernier siene Aant is nich veel bekannt. Annahmen warrt, datt se vör un na de Regentied bröden deit. De Nester liggt in dat Bentgras nich wiet af vun Wall un Water. In'n Döörsnitt gifft dat woll bi sess Eier.

De Aante in'n Zoo

Vunwegen, datt Bernier siene Aant keen sunnerlich smuck Fedderkleed vorwiesen kann, is se in de Tucht nie nich sunnerlich populär ween. Man vun de 1990er Johre af an is se in den Zoo vun Jersey tücht wurrn. Midderwielen weert Bernier siene Aanten ok in'n Weltvagelpark Wasra, in'n Kölner Zoo un in den Zoo vun Zürich holen un tagen. De Tucht is eenfach, vundeswegen kann dat angahn, datt de Aante, just as de Hawaiigoos, nich utstarven deit.

Literatur

• T. Bartlett, Ducks And Geese - A Guide To Management, The Crowood Press, 2002, ISBN 1-85223-650-7
• Hartmut Kolbe; Die Entenvögel der Welt, Ulmer Verlag 1999, ISBN 3-8001-7442-1

Weblinks

Bernier siene Aant. Mehr Biller, Videos oder Audiodateien to’t Thema gifft dat bi Wikimedia Commons.

Kiek ok bi

• List vun Vagels