Wigmodien weer en sassesch Go. Dat leeg twischen Werser un Elv. Wo groot dat genau weer, dat is nich kloor. In’n Noorden leeg dat Go Haduloha, dat hüdige Hadeln. Wat Wusten nu to Haduloha oder Wigmodien höör, is ümstreden. Na Süden müch dat Go woll bet na de Gegend vun dat hüdige Bremen recken.

Üm 450 rüm hett sik denn en groten Deel vun de Lüüd ut dit Go un ut annere Rebeden as Angelsassen tohoopdaan, is na Britannien röverseilt un hett England grünnt.

780 füng, nadem Karl de Grote Sassen innahmen harr, de Mission dör Willehad an. Na de Annalen vun Einhard hett Karl de Grote, nadem he mit sienen tweten Sassenkrieg 799 dör weer, all Lüüd, de in Wigmodien leven, deporteert. 10.000 Lüüd schöölt dat wesen hebben. Denn schall Karl de Grote Lüüd, de em tro weren, dor nee ansiedelt hebben. Wohrschienlich weer dat vun Einhard överdreven un dat weren nich all Lüüd, de he deporteert hett, denn archäoloogsch is dat nich natowiesen, dat dor to de Tied kene Lüüd mehr leven.

1062 harr Heinrich IV. Wigmodien den Arzbischop to Bremen to Besitt geven.