Wikipedia:Historie vun de Wikipedia

De plattdüütsche Wikipedia is de plattdüütsche Utgaav vun dat internatschonale Wikipedia-Projekt mit aktuell 85.118 Artikels över all Themen (de Milensteen, de uns na disse Tall henbröcht hebbt, staht ünner Wikipedia:Milensteen).

Historie

An’n 10. Januar 2003 geev dat de eerste Anfraag för ene plattdüütsche Wikipedia op de Wikipedia-Mailing-List. Aver dor keem noch nix na. Eerst as an’n 15. März un 17. April 2003 en annern Bruker noch wedder nafraagt hett, hett dat klappt. De Bruker Baas (later heet he denn Bruker Plattmaster) wull geern dat Artikelschrieven op Platt anfangen. An’n 27. April weer dat denn sowiet un he hett in de plattdüütsche Wikipedia de eersten Artikels schreven. Toeerst dee he dat noch ünner de Adress za.wikipedia.com, en Afkörten, wat nu de Wikipedia op Zhuang tohöört. De Adress weer al för de Wikipedia op Zhuang inplaant, doch de Bruker Baas hett ehr för siene plattdüütschen Artikels kapert, vun wegen dat en egen plattdüütsch Wiki noch nich opsett weer. An’n 31. Mai hett de Wikipedia denn ehr richtige Adress ünner nds.wikipedia.com kregen (hüüt is de Domään för all Wikipedia-Projekten .org, nich mehr .com). In de eersten Maanden bet Enn Juni harrn de Brukers över 300 Artikel schreven un dormit höör de plattdüütsche Wikipedia kort to de twintig gröttsten Wikipedias. Denn is dat Intress vun de Pioneer-Brukers wat afebbt un eerst wedder to Enn vun dat Johr 2004 nehm dat Intress wedder to. Den 1. Januar 2007 weer de Wikipedia blots noch de 89.-gröttste.

Op de aktuelle MediaWiki-Software (Phaas 3) is dat Wiki in’n Januar 2004 ümstellt worrn. Dor sünd Delen vun de Versionshistorie un to’n Deel ganze Artikels bi verloren gahn.

Weblenken

• Hööftsiet vun de plattdüütsche Wikipedia (plattdüütsch)
• Statistiken to de Wikipedia