Wiktor Wassiljewitsch Gorbatko

Wiktor Wassiljewitsch Gorbatko (russisch: Виктор Васильевич Горбатко; * 3. Dezember 1934 in Wenzy-Sarja, Asow-Swaartmeer-Region, hüüd in de Region Krasnodar, Russische SFSR; † 17. Mai 2017 in Moskau) weer en sowjeetsch Kosmonaut.

Wiktor Gorbatko

Gorbatko hett de Mittelschool besöcht, is ansluutend in de Root Armee intreeden un wurr van 1952 bit 1956 to’n Militärfleeger utbildt. Dornah is he in Deensten vun de Luftstrietkräften vun de UdSSR intreeden.

Wostok un Woschod

Af März 1960 bill Gorbatko tosommen mit 19 anner Luftwappenpiloten de eerste Kosmonautengrupp vun de Sowjetunion. He hett dat gesamte Trainingsprogramm dörloopen, hörr aber nich to de söss Kosmonauten, de de eerst Flüüg vun dat Wostok-Ruumschipp dörführen sullen.

He weer för latere Wostok-Flüüg vörösehn, de denn aber togunsten vun de grötter Woschod-Ruumscheep afseggt wurrn. De Mannschapsindeelen vun de sowjeetsch Ruumflüüg wurr nich blots ünner technisch Gesichtspunkten drapen, ok politische Gründe un de Rivalität vun de konkurreeren Konstruktschonsbüros hemm en Rull speelt.

Toeerst weer Gorbatko as een vun de Kommandanten vun de beide erst Woschodflüüg vörsehen, denn aber bleev hüm blots de Posten as Ersatzkommandant vun Woschod 2. Bi de nächst Mission, Woschod 3, harr Gorbatko Chancen harrt, to sien eerst Weltruumfloog to kommen, aber de Vörbereitungen trucken sück hen. De Mission wurr offizielle nie nich afseggt, keem aber ok nie in en konkret Planungsstadium.

Sojus

Af Harvst 1965 befunn sück Gorbatko tosommen mit söben anner Kosmonauten in de Utbillen för de nee Sojus-Ruumscheep, de för dat sowjeetsch Maandlandeprogramm konstrueert wurrn. Tietwies bill he en Mannschap tosommen mit Andrijan Nikolajew, den Veteranen vun Wostok 3.

Gegen Enn‘ 1966 wurr Gorbatko as Ersatzbesatten för en vun de beid eerst Sojusflüge as ok as Besatten för en vun de beid nächsten. As dat begäng weer wurr de endgültige Towiesen eerst kört vör den Start faststahn.

Gorbatko weer dann tatsächlich as Ersatzmann för Sojus 2A vörsehn. Dit Ruumschipp sull in‘ April 1967 as passiv Rendezvous- un Dockingpartner för Sojus 1 deenen un twee vun sien Kosmonauten den Umstieg in’t All mögelk maaken.

Wegen Problemen mit Sojus 1 in de Eerdumloopbahn bleev de startbereite Sojus 2A an‘ Grund. Dat hett de Mannschap vun Sojus 2A dat Leven rett, denn Sojus 1 is mehr oder minner dör konstruktschoons- un fardigungsbedingt Verseggen vun dat Fallschirmsystems bi de Lannen ungebremst up de Eer störrt. De Kommandant Wladimir Komarow keem dorbi to Dood. Ok bi Sojus 2A wurrn ansluutend de glieker Mängel faststellt.

In‘ August 1967 wurrn bi Gorbatko Hartprobleme faststellt, worup hüm tietwies de Floogtauglichkeit afspraaken wurr.

An‘ 15. Dezember 1968 kreeg Gorbatko as eenige vun sien Kosmonautenkollegen sien Diplom vun der Schukowsky Testpiloten-Hoochschool.

De scheitert Mission vun Sojus 1 un Sojus 2, dat Ankoppeln in de Eerdumloopbahn un dat Umstiegen vun twee Kosmonauten wurr in‘ Januar 1969 vun Sojus 4 un Sojus 5 nahhaalt. Gorbatko weer dorbi Ersatzmann för Jewgeni Chrunow un Alexei Jelissejew in Sojus 5, keem aber nich to‘n Insatz.

In‘ April 1969 wurr Gorbatko sluutend för sien eerst Ruumflug indeelt, bi de eerstmals dree Sojus-Ruumscheep bedeeligt ween sullen.

An‘ 12. Oktober 1969 is Gorbatko as Forschungskosmonaut mit Sojus 7 to sien eerst Mission upbraaken. Mit an Bord weern de Kommandant Anatoli Filiptschenko un Bordingenieur Wladislaw Wolkow, de beid ebenfalls hör eersten Ruumfloog ünnernehmen deen.

Knapp negen Johr harr Gorbatko up sien eerste Mission tööven muss. An‘ Vördag weer Georgi Stepanowitsch Schonin mit Sojus 6 start, so dat blots noch Dmitri Saikin as Liddmaat vun de eerst Kosmonautengrupp vun de UdSSR nich flaagen weer. Saikin muss aber in‘ folgen Oktober dat Kosmonautenkorps ut medizinischen Grünnen verlaaten, so dat Gorbatko dejenige vun de eerst Grupp weer, de an‘ längsten up sien Insatz tööven muss.

In de Eerdumloopbahn hett Sojus 7 en Rendezvous mit Sojus 6 un Sojus 8 dörführt. En plaant Kopplung hemm se aber nich henkreegen. De Ruumfloog düer fiev Daag.

Saljut un Interkosmos

Nah dissen Floog wurr Gorbatko för de nee Saljut-Ruumstattschoon utbildt, aber dat Unglück vun Sojus 11 un Probleme mit den folgen Saljut-Statschonen hemm dat Programm verzögert

Eerst 1976 kreeg he weer en Floogtowiesen: he hett in de Ünnerstüttensmannschap vun Sojus 21 arbeit. För den Floog vun Sojus 23 in‘ Oktober 1976 weer he in de Ersatzmannschap.

An‘ 7. Februar 1977 is Gorbatko mit Sojus 24 to sien tweeten Ruumfloog start, dit Mal as Kommandant. Tosommen mit sien Bordingenieur Juri Glaskow is he to de Ruumstatschoon Saljut 5 flagen, de vun de Crew vun Sojus 21 vör de Tiet verlaaten wurrn weer. Disse Missoin düer 18 Daag.

1978 weer he Ersatzmann för Waleri Bykowski bi de Mission Sojus 31, bi de in‘ Rahmen vun dat Interkosmos-Programm to’n eersten Mal en Düütschen (Sigmund Jähn) in den Weltruum floog. Gorbatko sien düütsch Partner in de Ersatzbesatten weer Eberhard Köllner.

To sien darten Ruumfloog is Gorbatko an 2. Juli 1980 mit Sojus 37 start. Tosommen mit den vietnameschen Kosmonauten Phạm Tuân floog he to de Ruumstatschoon Saljut 6 un de Stammbesatten dor Leonid Popow un Waleri Rjumin. Nah acht Daag sünd se weer mit dat Ruumschipp Sojus 36 torüch flaagen.

Insgesamt weer he 30 Daag, 12 Stünnen un 47 Minüüten in't All.

Wiktor Gorbatko in dat Johr 2011

Nah de aktiv Tiet

As an‘ 26. Januar 1982 Waleri Bykowski, Alexei Leonow, Andrijan Nikolajew un Pawel Popowitsch dat Kosmonautenkorps verlaaten deen, weer Gorbatko neben Boris Wolynow de eenzig verbleeven aktiv Kosmonaut vun de eerst Grupp.

Gorbatko hett sein aktiven Deenst aber ok all kört dornah an‘ 28. August 1982 upgeeven un wurr stellvertreeden Präsident vun dat Sportkomitee vun dat sowjeetsch Verteidigungsministerium. Later hett he as Perfesser an de Luftwappeningenieurakademie in Moskau arbeit.

Gorbatko weer verheiraadt un harr twee Döchter ut en eerste Ehe. He hett de Utteknung „Held der Sowjetunion“ kreegen un weer Dräger vun den Leninorden un vun den Orden der Freundschaft.

Weblenken

Wiktor Gorbatko. Mehr Biller, Videos oder Audiodateien to’t Thema gifft dat bi Wikimedia Commons.

• spacefacts.de: Körtbiografie