Wilhelm Bahlburg

Wilhelm Hermann Bahlburg (* 27. Oktober 1888 in Jesborg; † 17. Februar 1958 in Bookholt) weer en düütschen Politiker von de DP.

Bahlburg is 1888 in Jesborg boren. He weer dor op Volksschool un later op de högere Fortbildungsschool Harmsborg un de Bogewarkschoo Strelitz. He hett sik as Bomeester utbillen laten un sik 1914 as Handwarksmeester sülvstännig maakt. Later harr he en Saagwark, dat vondaag noch as Discheree in Jesborg besteiht.

He weer von 1922 bet 1925 Börgermeester von Jesborg. In Jesborg weer Bahlburg 1928 Mitgrünner von de Freewillige Füürwehr. He is toeerst as Viez-Hauptmann un an’n 9. Juli 1930 as Hauptmann (wat vondaag Oortsbrandmeester nöömt warrt) wählt worrn. Dit Amt harr he bet 1933.

Bahlburg harr Kredite von 130.000 DM bi de Kreisspoorkass Horborg. För de Gewährung von disse Kredite hett dat kene Vörutsetzungen geven. Bahlburg weer aver as Landraad von 1946 bet 1949 gliektiedig Vörsitter von’n Vörstand von de Spoorkass. Dorüm hett de Staatsanwaltschaft em Kreditbedrog vörhollen un gegen em ermittelt.

Bahlburg hett 1945 de Neddersassische Landspartei mit grünnt, de sik 1947 den ne’en Naam Düütsche Partei geven hett. Vonwegen dat Ermittlungsverfohren gegen em is he an’n 6. September 1951 ut de DP rut.

Von 1925 bet 1933 (för de DHP) un na 1945 wedder hett Bahlburg to’n Kreisdag von’n Landkreis Horborg tohöört. Von 1946 bet 1949 weer Bahlburg as Nafolger von Alfred Strack Landraad von’n Landkreis Horborg. 1949 hett Philipp Helbach dat Amt von em övernahmen.

Bahlburg weer Maat von’n ernannten Hannöverschen Landdag von’n 23. August 1946 bet 29. Oktober 1946 un ok Maat von’n ernannten Neddersassischen Landdag von’n 9. Dezember 1946 bet 28. März 1947. 1947 is he denn in de 1. Wahlperiood (von’n 20. April 1947 bet 26. Oktober 1950) as direkt wählten Afornten för den Wahlkreis Bookholt Maat von’n Neddersassischen Landdag worrn.

Von 1949 bet 1953 weer he Maat von’n Düütschen Bundsdag för den Wahlkreis Horborg-Soltau. He is för de Düütsche Partei wählt worrn, is aver an’n 7. September 1951 frakschoonslosen Afornten worrn. Von 23. Januar 1952 af an weer he Gast von de DP-Frakschoon. 4. September 1952 is he wedder frakschoonsloos worrn.

He weer verheiraadt mit Alma Bahlburg.