Wilhelm Kregel

Wilhelm Kregel (* 20. Februar 1909 in Rümelingen, Luxemborg; † 3. Juni 1994 in Veern) weer en düütschen Richter un Sportfunkschonär.

Kregel is 1909 in Rümelingen boren un in Veern opwussen. He hett Juristeree studeert un hett an de Universität Marburg sien Dr. jur. maakt mit en zivilrechtliche Arbeid över Störungsansprüche des Mieters gegen Dritte. Na dat Studium is he in’n Justizdeenst gahn.

In’n Tweten Weltkrieg weer he Soldaat. Na’n Krieg is he 1947 trügg in’n Justizdeenst. 1951 is he Richter an’n Bundsgerichtshoff worrn un weer von 1956 bet 1966 Präsident von dat Landgericht Veern. Von 1966 bet to sien Rohstand weer he Präsident von dat Oberlandsgericht Celle.

Kregel weer tosätzlich von 1964 bet 1978 Präsident von’n Düütschen Turnerbund un von 1970 bet 1974 Präsident von’n Düütschen Sportbund. In siene Amtstied hett he sik insett, den Bundsutschuss Leistungssport to stärken un den Spitzensport duller to zentraliseren. He hett dit Amt afgeven, kort bevör 1974 dör de binnendüütsche Entspannungspolitik dat düütsch-düütsche Sportprotokoll afslaten worrn is.

För siene Verdeensten üm den Sport in Neddersassen is he in de Ehrengalerie von’n neddersassischen Sport von dat Neddersassische Institut för Sportgeschicht opnahmen worrn.

1973 hett he dat Grote Verdeenstkrüüz von de Bundsrepublik Düütschland kregen.