Landgericht Veern
Dat Landgericht Veern is en Gericht von de Ordentliche Gerichtsborkeit, dat in Veern sitt. Dat is een von de ölven Landgerichten in Neddersassen.
Gerichtsbezirk
ännernÜnner dat Landgericht Veern staht de Amtsgerichten Achem, Deefholt, Neenborg, Oosterholt-Scharmbeek, Rodenborg, Stolzenau, Sulingen, Syke, Veern un Wasra. Över dat Gericht staht dat Oberlandsgericht Celle un de Bundsgerichtshoff in Karlsruhe.
Historie
ännernMit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un in Veern is en Bövergericht inricht worrn. Dor hebbt to de Tied de Amtsgerichten Veern, Snevern, Achem, Otterbarg, Leendaal, Oosterholt, Rodenborg, Zeven, Lesum un Blomendal tohöört.
Nadem 1859 dat Obergericht Leh oplööst worrn is, hett dat Obergericht in Veern de Amtsgerichten Dorum, Hagen un Leh tokregen.
Na dat Gerichtsverfatensgesett för dat Düütsche Riek von 1877 sünd de Gerichtsbezirken nee indeelt worrn. Eerste Plaans harrn dat, dat dat Bövergericht in Veern dichtmaken un Deel von’n Gerichtsbezirk von dat Landgericht Stood warrn schull, aver de Börgers hebbt sik dor för insett, dat dat Gericht in Veern blifft. So is dat kamen. Aver dat Bövergericht Neenborg müss dichtmaken un sien Gerichtsbezirk is Deel von’n Gerichtsbezirk von dat Gericht in Veern worrn.
Na’n Tweten Weltkrieg hett dat Landgericht Veern an’n 3. Juli 1945 mit toeerst een Straafkamer wedder apenmaakt.
Gerichtsgebüüd
ännernIn de eersten Johren weer dat Gericht in dat Raadhuus von Veern ünnerbröcht. Von 1882 bet 1884 is en neet Gerichtsgebüüd boot worrn. Dat weer en roden Backsteenbo in’n Stil von de Grünnertied. Op de Höögd von de eerste Etaasch weren de Wöör Koenigliches Landgericht anbröcht, över de links un rechts twee prüüßsche Aadlers waken deen.
1962 is twüschen Landgericht un Amtsgericht en neet Gebüüd boot worrn, in dat de Staatsanwaltschop rin schull. 1962 weer dor för en Tied dat Landgericht ünnerbröcht, as dat Landgerichtsgebüüd ümboot worrn is. Dat Amsgericht is later afreten worrn un dor is en Neebo för kamen, de 1982 trech weer. In dissen Neebo is denn ok de Staatsanwaltschop intagen un dat Gebüüd von 1962 hett 1982 dat Landgericht övernahmen.
Organisation
ännernPräsident von dat Gericht is Rüdiger Lengtat. Dat Gericht hett 34 Richters. Dat gifft 14 Straaf- un ölven Zivilkamern, von de twee Kamern för Hannelssaken tostännig sünd.
Präsidenten
ännern- Hieronymus von der Decken (1879–1892)
- Carl Schrader (1892–1911)
- Arthur Westrum (1911–1923)
- August Canenbley (1923–1933)
- Hans Gentzen (1933–1937)
- Hermann Lindemann (1938–1945)
- Erich Lindenberg (1945–1946)
- Eberhard Hagemann (1946–1948)
- Hans von Nordheim (1949–1956)
- Wilhelm Kregel (1956–1966)
- Jan Kramer (1966–1972)
- Eberhard Stalljohann (1972–1974)
- Heinrich Beckmann (1974–1997)
- Wolfgang Arenhövel (1997–1999)
- Rüdiger Lengtat (seit 1999)
Weblenken
ännern- Websteed von dat Landgericht Veern (hoochdüütsch)
- Översicht över de Rechtspröök von dat Landgericht Veern (hoochdüütsch)
Koordinaten:52° 55′ N, 9° 14′ O
