Wiltshire-Horn-Schaap
Dat Wiltshire-Horn-Schaap is en Schaap, dat in de Graafschop Wiltshire in'n Süden vun England tohuse is.
Vör 200 Johren is düsse Raass al bekannt ween. Se hett al to de Tiet bannig korte Wull harrt. In'n Summer hefft de Schaap en Summerfell. In'n Winter kriegt se en Winterfell, wat woll bi 3,5 cm dick is. Dat warrt den avers in'n laten Winter al wedder afsmeten. So bruukt de Wiltshire-Hoornschaap nich scharen weern.
De Wiltshire-Horn-Schaap hefft Höörn, dat seggt ja al de Naam. Nich bloß de Bück, man ok de Auschaap dreegt Höörn. Dat sütt woll smuck ut, man vundagen is dat vunwegen den Weidetuun towielen en Problem. Hen un wenn kann dat passeern, dat en Hoornschaap sik in den Draht vertüdelt.
De Auschaap weegt bi 70-80 kg, de Bück 100-110 kg. De Aflammtall liggt bi 130-140%. Düt Schaap hett wenig Problemen mit de Geboort. Ok bi de Klauen gifft dat keen Arger. Dat Wiltshire-Horn-Schaap warrt as Schaap för de Koppel ankeken. To'n Höden un över-Land-tehn passt dat nich so goot.
De Raass warrt för de Fleeschproduktschoon insett. Dat Fleesch hett wenig Fett. Ok in verscheden Länner in de Tropen warrt se mit inheemsche Schaap krüüzt, üm en beter Fleeschproduktschoon in Gang to setten. Hüdigendags weert Wullschaap nich mehr so veel bruukt, weil de Pries för Wull so unbannig bargdal gahn is. Nu weert Wiltshire-Hoornschaap in ole Wullschaap-Rassen inkrüüzt, üm bitherige Wullschaapherden in Fleeschschaapherden um to muddeln. So maakt se dat ok in Australien, wo de Wiltshire-Hoornschaap ut düssen Grunne mit de inheemschen Merinoschaap krüüzt weert.
In dat Johr 2000 geev dat in ganz Düütschland acht Bück un 47 Auschaap. Man dat weert jedet Johr mehr.
Kiek ok bi
ännernWeblenks
ännern- UK Wiltshire Horn Sheep Society (engelsch)
- Australian Wiltshire Horn Breeders Association (engelsch)
- Websteed von Groote Haar, de öllste Wiltshire-Horn-Tucht op’n Kontinent (nedderlandsch)