Adolph Bernhard Cronemeyer

Adolph Bernhard Cronemeyer (* 17. Januar 1829 in Neehuus; † 18. März 1900 ok dor) weer en düütschen Koopmann un Politiker. He weer von 1883 bet 1884 Maat von’n Düütschen Rieksdag.

Leven

Cronemeyer is 1829 as Söhn von’n Avkaat Hermann Cronemeyer in Neehuus boren. De Vader is na Amerika utwannert un al 1837 doodbleven. 1856 hett Cronemeyer dat Geschäft von de Grootmoder Sophia Eleonore Ulex övernahmen. De Firma hett G. F. Ulex Nachfolger heten un bestünn al siet 1795. Dat Geschäft hett ünner annern en Bramwien- un Wienhannel, en Zigarrnmanufaktur un en Reederee ümfaat. Cronemeyer weer ok Freemürger un bet 1898 in de Gemeenpolitik aktiv. He harr Andeel an’t Grünnen von de Neuhäuser Zeitung un de Neehüser Spoorkass. Ok för’n Bo von de Iesenbahnlien twüschen Hamborg un Cuxhoben hett he sik stark insett, de denn 1881 as Nedderelvbahn in Fohrt keem.

Nadem 1883 Rudolf von Bennigsen sien Mandaat in’n Rieksdag dalleggt harr, is Cronemeyer in en Nawahl in’n Wahlkreis Provinz Hannover 19 in’n Rieksdag wählt worrn un weer dor Maat von de Düütsche Freesinnige Partei. Bi de Rieksdagswahl 1884 hett he dat Mandaat aver al wedder an Hermann Gebhard ut Bremerhoben verloren.

Cronemeyer weer verheiraadt mit Metha Catharine Beyermann. De twee Söhns, de se tohoop harrn, sünd 1897 doodbleven. Cronemeyer sien Firma in Neehuus besteiht ok vondaag noch. En Beer von de Firma is 2005 na Cronemeyer nöömt worrn.