Valle del Aguán

Dat Valle del Aguán (Aguán-Daal) is dat Daal von’n Río Aguán in de Departamentos Yoro un Colón in Honduras. De Region von dat Daal warrt ok Bajo Aguán nöömt.

Geografie

Dat Daal reckt sik von Süüdwest na Noordoosten över 160 Kilometer von Perritos (Municipio Olanchito, Yoro) bet na de Küst von de Karibische See. In dat Departamento Yoro liggt an dat Noordöver dat Municipio Olanchito un an dat Süüdöver de Municipios Jocón, Arenal un Olanchito. In dat Departamento Colón liggt dat Municipio Sabá an beide Övers, de Municipios Sonaguera, Trujillo un Santa Rosa de Aguán an dat Noordöver un Tocoa, Bonito Oriental un Limón an dat Süüdöver.

In Yoro is dat Daal nich veel breder as teihn Kilometer, in Colón warrt dat denn mit 15 Kilometer en beten breder. Allens tohoop sünd dat üm un bi 2000 km². In’n Noorden doot de Bargen von de Cordillera Nombre de Dios liggen un in’n Süden de Cordillera de La Esperanza.

Historie

To Anfang von dat 20. Johrhunnert weer dat Daal en wichtig Anborebeed för Bananen. In de Johre 1930 sünd de Plantaaschen aver to en groten Deel opgeven worrn. Dormit is ok de Inwahnertall gau dalgahn. Eerst in de Johren 1970 hett dat ne’e Initiativen geven, dat Daal weddertobeleven. De Inwahnertall, de 1961 bi 68.000 leeg, weer bet 1980 op 181.000 ropkladdert. In dat Daal warrt nu vör allen Ananas, Pampelmusen, Kokosnööt un Bananen anboot. Aver ok de Anbo von Öölpalmen hett jümmer mehr tonahmen. Alleen de Corporación Dinant boot op meist 9000 Hektar Öölpalmen an.

De Kunflikt twüschen Lüttbuurn un grote Landbesitters hett jümmer wedder to Vörfäll föhrt, bi de ok Lüüd doodbleven sünd.