Amalasuntha
Amalasuntha (ok Amalasuentha, Amalaswintha, Amalasuintha; † 30. April 535 up de Eiland Martana in de See van Bolsena, Latium) weer een ostgootsche Königin.
De Dochter van Theoderich de Grote is 515 mit Eutharich († 522) verheiraad wurrn. Dat weer een Westgoot, de sien Bloodlinie bit hen to Ermanarich torüchverfolgen kunn. De beid harrn twee Kinner, Athalarich (* 516; † 534) un Matasuentha (* 518; † later as 550) (ok Mataswintha, Matasuntha).
König Theoderich de Grote is 526 doot bleven un so, at he dat wullt harr, is denn Athalarich sien Nahfolger wurrn. De weer do mal aber eerst 10 Johr oolt, so dat sien Moder Amalasuntha as Vörmund de Regentschop övernommen hett.
Se weer aber stark verbunnen mit de röömsche Kultur. Dorto weer se düchtig klook (se kunn mehrere Spraken) un so weer se dorup, en Utgliek to maken tüschen de Ostgoten und de Römers. Ehr Söhn hett se denn in’ Sinn van de Römers ertrucken, wat de gootsche Fürsten nicht so gern harrn. De Fürsten harrn sük all bi de Beerdigung van her Vader van her afwend’. Se sülvst hett dree gootsche Adelige, van de se dach, dat de tegen her weern, eerst rutsmeeten un denn doot maken laten. Mit Kaiser Justinian I. hett se Verhandlungen föhrt, mit dat Ziel, sük sülms und de gootsche Adel nah Konstantinopel umtosiedeln.
Athalarich is denn (534) doot bleven, un se wuur denn Königin, hett aber her Cousin Theodahad to’n Mitregenten maakt, um ehr eegen Positschoon starker to maken. Aber all in dat Johr 535 hett Theodahad her in Ravenna gefangen nommen, up de Eiland Martana in’ See van Bolsena fastsett un dornah ümbringen laten. Se hebbt her in’t Bad erwörgt.
Bold all, wat man an Informatschoonen över Amalasuntha hett, kommt van Breefen, de Cassiodor, Oberminister un literarischen Raatgever van Amalasuntha, schreven hett un van de histoorisch Berichten van Prokop un Jordanes.